Իր տարեվերջյան ամփոփիչ ելույթում ՊԵԿ նախագահ Գագիկ Խաչատրյանը հայտարարել էր. «Պետական եկամուտների կոմիտեն տարին ամփոփել է` ապահովելով շուրջ 590 մլրդ դրամի հարկային եկամուտներ, ինչը ծրագրած ցուցանիշը գերազանցում է շուրջ 20 մլրդ դրամով: Համեմատության համար հարկ է նշել, որ 2010 թ. հարկային եկամուտները գերազանցել են 2009 թ. ցուցանիշը` շուրջ 70 մլրդ դրամով»: Առաջին հայացքից «խոսուն» թվացող այս թվերի հետևում իրականում ուրիշ բան է թաքնված: Այսպես, եթե 2009 թվականի ցուցանիշը գերազանցվել է 70 մլրդ դրամով, ապա գերազանցման տոկոսը կկազմի 13.4%: Սակայն 2010 թ. 2009 թ. համեմատ սպառողական գների աճը կազմել է 9.4%, ինչը նշանակում է, որ եթե ՊԵԿ-ը ոչ մի նոր բան էլ չաներ, 2009 թ. համեմատ հարկային մուտքերը «մեխանիկորեն» պետք ավելանային ճիշտ այդքանով: Ստացվում է, որ հարկային մուտքերի իրական աճը (գնաճը հաշվի առած) կազմել է 4%: Իսկ եթե հաշվի առնենք նաև այն, որ 2009 թ. համեմատ 2010 թ. ՀՆԱ աճը կազմել է 2.4%, իսկ ՀՆԱ 1 միավոր աճը տնտեսական օրենքներով պետք է որ ապահովի հարկային մուտքերի 2 և ավելի միավոր աճ, ապա ստացվում է, որ ՊԵԿ-ի «աշխատանքի» արդյունքը գլուխ գովելու հիմք չի տալիս: