1894թ. այս օրը Տրապիզոնում ծնվեց հայ թատրոնի անվանի դերասան, ՀՍՍՀ վաստակավոր արտիստ Համբարձում Խաչանյանը:
Մեկ տարեկանում տեղափոխվել է Սիմֆերոպոլ, ավարտել հայկական ծխական դպրոցի չորս դասարանները, այնուհետև ուսանել է տեղի ռուսական քաղաքային դպրոցում, որը հոր մահից հետո թողել է անավարտ, և ապա հետագայում ավարտել էքստերն կարգով: Սափրիչ Միսակը, ով նաև թատերական կեղծամներ պատրաստող էր, որդուն հաճախ է տարել թատրոն՝ նրա մեջ արթնացնելով սեր դեպի բեմն ու թատրոնը: Եվ շուտով պատանի Համբարձումը դառնում է աշակերտական ներկայացումների մասնակիցը Եկատերինոդարում (Կրասնոդար), ուր միաժամանակ ապրել է Խաչանյանների ընտանիքը:
Տարիներ հետո Համբարձումը ստանում է նաև մասնագիտական կրթություն: Նա 1917թ. գերազանց գնահատականներով ավարտում է Սիմֆերոպոլի կինոդերասանական ստուդիան:
Խաչանյանը դառնում է դերասան՝ Բաթում, Սուխում, Կրասնոդար, Սիմֆերոպոլ և այլ քաղաքներում հանդես գալով ռուսական, երբեմն նաև հայկական թատերախմբերի հետ: Հենց Բաթումում խաղալիս էլ 1922թ. նրան տեսնում ու գնահատում է Վահրամ Փափազյանը և երիտասարդին իր հետ բերում Երևան: Խաչանյանը դառնում է Առաջին պետթատրոնի դերասան:
Խաղացել է նաև մի շարք ֆիլմերում՝ «Նամուս» (Բադալ), «Զարե» (Խդո), «Շոր ու Շորշոր» (Շոր), «Կիկոս» (Կիկոս), «Պեպո» (Դարչո):
Մահացել է 1944 հունիսի 30-ին Երևանում: