Ցանկացած նոր տարի իր հետ բերում է ակնկալիքներ և ցանկություններ, սակայն միշտ չէ, որ ցանկություններն ու իրականությունը համընկնում են: Խոսքի ազատության պաշտպանության կոմիտեի նախագահ Աշոտ Մելիքյանի ակնկալիքները 2011 թվականից ևս բախվում են ցանկության և իրականության տարբերության հետ: Մելիքյանի գնահատմամբ՝ մի բան է ցանկությունը, մեկ այլ բան՝ իրականությունը. «Իմ ցանկությունն այն է, որ 2011 թ. մեր երկրում գերիշխի խոսքի ազատությունը, որպեսզի լրագրողներն իրենց պարտականությունները կատարեն առանց խոչընդոտների և վտանգների»:
Ինչ վերաբերում է իրականությանը, ապա, ըստ Աշոտ Մելիքյանի, 2011 թ. երկրորդ կեսը բավականին լարված կարող է լինել՝ կապված 2012 թ. խորհրդարանական ընտրությունների հետ. «Եթե մենք վերհիշենք և համեմատենք մնացած նախընտրական տարիները, ապա, կարծում եմ, որ գալիք տարում լրատվամիջոցներին և լրագրողներին բավականին փորձություններ են սպասվում: Ես կուզենայի, որ լրագրողները պատվով հաղթահարեն այդ փորձությունները և պատվով կատարեն իրենց առաքելությունը»:
«2011 թ. բոլոր լրագրողներին կմաղթեի մասնագիտական հաջողություններ, իսկ ողջ հայ ազգին՝ առողջություն, լավատեսություն և բարեկեցություն»,- իր մաղթանքը փոխանցեց Աշոտ Մելիքյանը: