«Լիսկան» Սյունիքում երկար կմնա

Սյունիքի մարզպետ Սուրիկ Խաչատրյանը 2010թ-ը մարզի համար բարեհաջող տարի է համարում։ Նրա խոսքով, համարյա բոլոր ծրագրերը կյանքի են կոչվել։ Մարզի հիմնախնդիրները հանրապետության իշխանությունների ուշադրության կենտրոնում էին։ Պետբյուջեով իրականացվող ծրագրերով նախատեսված 4,4 մլրդ դրամը ամբողջովին հատկացվել է։ Մարզի սոցիալ-տնտեսական զարգացման ծրագրերի իրականացման համար կառավարության պահուստային ֆոնդից հատկացվել է 128 մլն դրամ, ինչը 120 մլն-ով ավելի է նախորդ տարվա ցուցանիցից։ Համայնքների բյուջեները եկամտային մասով կատարվել են 93,5 %-ով, սեփական եկամուտները՝ 83.8 %-ով. հողի հարկի գծով հավաքվել է 224,2 հազ դրամ կամ նախատեսվածի 97,3 %-ը։ Գույքահարկի վարձավճարների գումարը կազմել է 187 մլն դրամ կամ նախատեսվածի 91.3 %։ Մարզի տնտեսության առանցքը շարունակում է մնալ հանքարդյունաբերությունը. 2010թ հանրապետությունում թողարկված արդյունաբերական արտադրանքի մոտ 18,2 %-ը բաժին է ընկել Սյունիքի մարզին: Համակարգված աշխատանքներ են իրականացվել միջազգային կառույցների, հիմնադրամների ու բարեգործական կազմակերպությունների հետ: Սյունիքի մարզպետի խոսքով, գուցե չոր թվերը ոչինչ չեն ասի, յուրաքանչյուր սյունեցի այդ ամենը հավանաբար զգացել, նկատել է։ Սուրիկ Խաչատրյանը համոզված է, որ միայն միասնական աշխատանքով կարելի է հասնել հաղթանակների, և սյունեցին բազմիցս դա ապացուցել է։ Ամանորի շեմին մարզպետի ցանկությունն էլի նույնն է՝ հանդուրժողականություն, միասնություն ու համագործակցություն: Ամանորի իր խոսքում Ս. Խաչատրյանը ասաց, որ ինքը դեռ երկար է կառավարելու Սյունիքը: