Խոսքի ազատության պաշտպանության կոմիտեն կաջակցի լրագրող Հայկ Գևորգյանին: Այս մասին «Առաջին լրատվական»-ի հետ զրույցում ասաց Խոսքի ազատության պաշտպանության կոմիտեի նախագահ Աշոտ Մելիքյանը`անդրադառնալով «Հայկական ժամանակ» օրաթերթի թողարկման պատասխանատու Հայկ Գևորգյանի կալանավորման դեպքին:
Աշոտ Մելիքյանն ասաց, որ իրենց աջակցության հնարավոր ձևերը կքննարկեն «Հայկական ժամանակ» օրաթերթի խմբագրության հետ: Ա. Մելիքյանի համոզմամբ` աջակցությունն անհրաժեշտություն է: Խոսքի ազատության պաշտպանության կոմիտեի նախագահը խուսափեց կալանավորման առնչությամբ գնահատականներ տալ՝ նշելով, որ չի տիրապետում կալանավորման հիմքերին և մանրամասներին:
Հիշեցնենք, որ այսօր առավոտյան տանից դուրս գալուց կալանավորվել է «Հայկական ժամանակ» օրաթերթի թողարկման պատասխանատու Հայկ Գևորգյանը: Նա հունվարի 23-ից հետախուզման մեջ է եղել, սակայն այդ օրերին զբաղվել է աշխատանքային` լրագրողական գործունեությամբ: