ԱՄՆ Վիսկոնսին նահանգի 46-ամյա բնակչուհի Մերիեն Օլեսոնը մեղադրվում է 75 հազար դոլար արժողութամբ Facebook-ի կեղծ բաժնետոմսեր վաճառելու մեջ: Այս մասին հայտնում է ИТАР-ТАСС գործակալությունը:
Դատախազության ներկայացուցիչները հինգշաբթի օրը հայտնել էին, որ Օլեսոնը իր ծանոթներին պատել է, իբր իրեն են պատկանում Facebook-ի 1 միլիոն դոլար արժողությամբ բաժնետոմսեր՝ շնորհիվ այն բանի, որ իր դուստրը ծանոթ է սոցցանցի հիմնադիր Մարկ Ցուկերբերգի հետ: Այդ կերպ նրան հաջողվել է մի քանի մարդու համոզել` գնել կեղծված բաժնետոմսերը:
Համաձայն դատական փաստաթղթերի, Օլեսոնի խաբեբայության զոհ է դարձել նրա բնակարանը վերանորոգող բանվորը: Օլեսոնը նրան՝ որպես կատարված աշխատանքի գումար, վճարել է կեղծ արժեթղթերը` մոտ 14 հազար դոլար արժողությամբ: Բացի այդ, բանվորը կնոջից գնել է «լրացուցիչ» բաժնետոմսեր` կանխիկ վճարելով 10 հազար դոլար:
Աշխատողը կասկածել է, որ ինչ-որ բան այն չէ, երբ նկատել է «որոշ տարօրինակություններ» գործարքի մասին փաստաթղթեր տրամադրելու ժամանակ:
Օլեսոնը մեղադրվում է նաև Վիսկոնսինի 66-ամյա բնակչին խաբելու մեջ: Վերջինիս նա դուրս է գրել չորս անդորրագիր` 43 հազար դոլար ընդհանուր գումարով, իբր Facebook-ի «բաժնետոմսերի» համար: Դատախազության տվյալների համաձայն՝ Օլեսոնը նրան խոստացել է բաժնետոմսերի սեփականության վերաբերյալ վկայականներն ուղարկել փոստով, ինչը, իհարկե, չի արել:
Բացի այդ, ամերիկուհին մեղադրվում է ևս երկու անձանց 9.9 հազար դոլար արժողությամբ կեղծ արժեթղթեր վաճառելու մեջ:
