ИТАР-ТАСС-ի փոխանցմամբ՝ Ճապոնիան խնդրել է ԱՄՆ-ին՝ իրեն ազատել Իրանի դեմ սահմանված պատժամիջոցների մի մասից: Խոսքը իրանական նավթի մատակարարումների, ինչպես նաև Իրանի Կենտրոնական բանկի հետ ճապոնական բանկերի ֆինանսական օպերացիաների մասին է:
Ճապոնական կողմն արդեն իսկ տվյալ խնդրի շուրջ բանակցություններ է վարել ամերիկյան կողմի հետ, սակայն դեռևս հայտնի չէ, թե ինչպիսի պատասխան է տվել ԱՄՆ-ը: ԱՄՆ-ում չեն բացառում, որ այս խնդիրը Ճապոնիայի օգտին կարող է լուծվել այն դեպքում, եթե Ճապոնիան կրճատի Իրանից նավթի մատակարարման ծավալը:
Նշվում է, որ վերջին 5 տարիներին Ճապոնիան 40 տոկոսով կրճատել է իրանական նավթի ներկրումը: Ամերիկյան մամուլը գրում է, որ Սպիտակ տունը, ամենայն հավանականությամբ, գոհ կլինի, եթե Ճապոնիան հետագայում 18 տոկոսով կրճատի իրանական նավթի ներկրումը: Այդ դեպքում ճապոնական բանկերին կթույլատրվի ֆինանսական օպերացիաներ վարել Իրանի Կենտրոնական բանկի հետ:
Հիշեցնենք, որ Ճապոնիան երկրին անհրաժեշտ նավթի 10 տոկոսը ստանում է Իրանից։ Իրանի հետ կնքած երկարաժամկետ պայմանագրերի հիման վրա Ճապոնիան օրական Իրանից ներկրում է 350,000 բարել նավթ։ Ճապոնիային նավթի մատակարարման հարցում Իրանը 4-րդն է՝ Սաուդյան Արաբիայից, ԱՄԷ-ից և Կատարից հետո։
