Հրազդանի նախկին քաղաքապետ, Հայ ազգային կոնգրեսի ներկայացուցիչ Սասուն Միքայելյանը փաստում է, որ իր համախոհների հանդեպ խտրական վերաբերմունքը շարունակվում է. ոմանց ազատում են աշխատանքից, ոմանց էլ զանազան միջոցներով փորձում հետ պահել իր հետ բակային հանդիպումների մասնակցելուց: Այս մասին Արցախյան պատրազմի ազատամարտիկն ասաց «Առաջին լրատվական»-ի հետ զրույցում:
«Հրազդանի Կաքավաձոր թաղամասի թիվ 7 դպրոցում մարդկանց «սուտի» ծնողական ժողովի են հրավիրում, փակում են դասասենյակներում, որ նրանք չկարողանան ինձ հետ հանդիպումների գալ: Աշակերտներին էլ են արգելում, բայց նրանք լուսամուտներից թռնում-գալիս են: Այդ դպրոցի տնօրենը քաղաքապետարանի աշխատակազմի ղեկավար Աշոտ Միքայելյանի կինն է»,- ասաց Սասուն Միքայելյանը:
Նա նաև պատմեց, որ շարունակվում են իր համախոհներին աշխատանքից ազատելու դեպքերը: «Օրինակ՝ գործից հեռացրել են էլցանցի ինժեներին»,- ասաց ՀԱԿ ներկայացուցիչը: Հարցին՝ այս բոլոր միջոցառումները նպաստե՞լ են, որ իր համախոհների շարքերը նոսրանան, Հրազդանի նախկին քաղաքապետը պատասխանեց, որ հակառակը, այդ ճնշումներից հետո իրեն սատարողների թիվը գնալով ավելանում է:
Հիշեցնենք, որ Հրազդանի քաղաքապետի ընտրությունները տեղի կունենան փետրվարի 12-ին: Բացի Սասուն Միքայելյանից, իր թեկնածությունն է առաջադրել նաև Հրազդանի գործող քաղաքապետ ՀՀԿ-ական Արամ Դանիելյանը: