Մեր ձեռքի տակ է ֆինանսների նախկին նախարար Տիգրան Դավթյանի ստորագրությամբ բավական ուշագրավ մի հրաման, որն ուղղված է ՀՀ պետական կառավարչական հիմնարկներին և Պետական գնումների գործակալության պետ պրն Հ.Բեգլարյանին: Հրամանով ո՛չ ավել, ո՛չ պակաս, սահմանվում է, որ «ծաղիկներ և ծաղկեպսակներ առարկան ներառվել է պարբերական մրցույթներով ձեռքբերվող ապրանքների աշխատանքների և ծառայությունների ցանկում»: Իսկ հաշվի առնելով այն, որ նման կարգով ապրանքների ձեռքբերումը տևում է մոտ 10 օր, ապա ծաղկեպսակների պատվերի դեպքում բավական ուշագրավ իրավիճակ կարող է ստացվել: Եթե ծաղիկները հիմնականում լավ առիթների համար են պատվիրվում, և այդ առիթները հնարավոր է նախապես իմանալ, ապա պարզ չէ, թե ինչպես են ծաղկեպսակ պատվիրողներն իմանալու, որ այսինչ կամ այնինչ պաշտոնյան 10 օր անց պետք է մահանա, որպեսզի հասցնեն նախապես ծաղկեպսակ պատվիրել: Դավթյանի այս անհեթեթ հրամանը միայն մի դեպքում կարող է գործել. եթե մահանալ պատրաստվող պաշտոնյաները նախապես տեղեկացնեն բոլոր պետական կառույցներին, որ իրենք մի տասը օրից պատրաստվում են մահանալ: