Նախընտրական շրջանում դիրքային պայքար է գնում. կուսակցությունները սկսում են ամրապնդել իրենց դիրքերը: Այսօր կայացած մամուլի ասուլիսի ժամանակ այս մասին հայտարարեց ՀՀ նախկին արտգործնախարար, «Ազատ դեմոկրատներ» կուսակցության անդամ Ալեքսանդր Արզումանյանը:
«Շատ հետաքրքիր փուլ ենք մտնում և արդեն սպառել ենք բիրտ ձևով ընտրությունները կեղծելու լիմիտը: Չեմ ասում, որ կեղծիքների փորձ չի լինելու, որ իշխանությունները չեն անելու ամեն ինչ, որպեսզի վերարտադրվեն, սակայն իրավիճակը փոխվում է: Այսօր դա շատ ավելի բարդ է, քան մի քանի տարի առաջ: Մենք էլ պետք է ձգտենք մեր ուժերի ներածի չափով սահմանափակել ընտրակեղծիքների հնարավորությունները»,- ասաց նա:
Պատասխանելով լրագրողներից մեկի հարցին` հավաստի՞ են լուրերը, որ ինքը վերջին ժամանակներս հաճախ է հանդիպում ՀՀ ԱԳ նախկին նախարար Վարդան Օսկանյանին, Արզումանյանը նշեց.
«Սա դեղին մամուլին վայել ոճ է. իմ հրաժարականից հետո Օսկանյանի հետ ընդհանրապես չեմ հանդիպել: «Սիվիլիթաս» հիմնադրամն ինձ հրավիրել է որպես բանախոս` մեկ շաբաթ առաջ մի ծրագրի մասնակցելու: Օսկանյանը, լինելով այդ հիմնադրամի նախագահ, դիմավորել է ինձ: Շատ կզարմանայի, որ չդիմավորեր: Ողջունել ենք միմյանց և անցել դահլիճ, բայց հանդիպումներն այդքանով էլ սահմանափակվել են»,- ասաց Ա. Արզումանյանը:
Արզումանյանի խոսքով՝ ինքն Օսկանյանին երբեք մարդասպան չի անվանել, սակայն ասել է, որ նա մարտի 1-ի կարևորագույն պատասխանատուներից մեկն է. «Նա այն ժամանակ նախագահականից խաղաղ ցուցարարներին վերագրում էր ամենատարբեր ապօրինություններ և սատարում նախապատրաստվող սպանդի ողջ գործընթացը: Այդքանով նա մյուս իշխանավորների հետ կիսում է մարտի 1-ի զարգացումների պատասխանատվությունը»:
