ՀՀԿ խմբակցության պատգամավոր Ռաֆիկ Պետրոսյանն այսօր բավական սուր է արտահայտվել ՕԵԿ-ի մասին: «Դուք գիտեք, որ ամենազարգացած կուսակցություններից մեկը, ձայների քանակով կոալիցիայի մեր երրորդ կուսակցության համար հենց որ տեղ է ազատվում, կադրեր չի ունենում այդ տեղերում նախարար նշանակելու համար: Երբ ասում եմ՝ կուսակցությունները զարգացած չեն, նկատի ունեմ նաեւ դա»,- ասել է նա: Ռաֆիկ Պետրոսյանը նաեւ հայտարարել է, թե միայն ՀՀԿ-ն ու ԲՀԿ-ն կարող են այդ հարցում դիմանալ մրցակցությանը, իշխանությունը վերցնել իրենց ձեռքը, բոլոր պաշտոններում նշանակել իրենց մարդկանց եւ այդպես պատասխանատվություն կրել երկրում տիրող իրավիճակի համար:
Լրագրողի հարցին, թե արդյո՞ք բանախոսը նկատի ունի ՕԵԿ-ին, Ռաֆիկ Պետրոսյանը հայտարարել է, թե ինքը ՕԵԿ-ի անունը չի տվել: Սակայն անկախ նրանից` ՕԵԿ-ի անունը տվել է, թե ոչ, միեւնույն է, բոլորի համար էլ ակնհայտ է, որ Ռաֆիկ Պետրոսյանը հենց այդ կուսակցության մասին է խոսում, քանի որ եթե կոալիցիայի 3 կուսակցություններից առանձնացնում է ՀՀԿ-ին ու ԲՀԿ-ին, ապա պարզ տրամաբանությամբ, ստացվում է, որ նկատի ունի ՕԵԿ-ին:
Այսօր ողջ օրվա ընթացքում ՕԵԿ-ը այդպես էլ չարձագանքեց այս հայտարարությանը: