Սիրիայում այսօր դարձյալ իրանցի ուխտագնացներ են առևանգվել: Ըստ ИТАР-ТАСС-ի` այս մասին տեղեկացրել է Իրանի պետական հեռուստաընկերությունը` ընդգծելով, որ այդ երկրում առևանգված ԻԻՀ քաղաքացիների թիվն արդեն հասնում է 29-ի:
Դամասկոս մեկնող ավտոբուսը, որում եղել են 35 իրանցիներ, կանգնեցրել են զինված անձինք: Նրանք ուղևորներից առգրավել են բջջային հեռախոսները, փաստաթղթերը, արժեքավոր իրերը, ապա 11 տղամարդու տարել են անհայտ ուղղությամբ:
Ի դեպ, անցյալ շաբաթ ևս զինյալները իրանցի ուղևորներ տեղափոխող ավտոբուս են կանգնեցրել և դարձյալ տարել միայն տղամարդկանց` ձեռք չտալով կանանց, երեխաներին ու ծերերին:
ԻԻՀ ԱԳՆ պաշտոնական ներկայացուցիչ Ռամին Մեհմանփարասթը սիրիական իշխանություններին կոչ է արել անել հնարավորը` իրանցիների շուտափույթ ազատագրելու համար:
Անցյալ տարվա դեկտեմբերին էլ Հոմս քաղաքի մերձակայքում առևանգել էին էներգետիկայի ոլորտի 7 իրանցի մասնագետների: