Ազատազրկման մեջ գտնվող Արման Միքայելյանի մոր` Գոհար Գալստյանի համոզմամբ, իր որդու դատապարտման պատմության ետևում մի շարք ազդեցիկ մարդիկ են թաքնված, որոնք իսկական մեղավորներին թաքցնելով, թրաֆիքինգի դեմ պայքարելու մասին ցուցանիշներ ներկայացնելու համար դատապարտել են անմեղին, իսկ մեղավորներին հնարավորություն տվել շարունակել իրենց ոճրագործությունը:
Իսկ պատմությունը հետևյալն է. 2010 թվականի նոյեմբերի 28-ին ՀՀ ոստիկանության Երևանի Կենտրոնականի բաժնում հայտարարություն է ստացվում ոմն Ինեսա Խաչատրյանից և Նարե Հարությունյանից այն մասին, որ իրենց ծանոթ Համլետ Դավթյանը համապատասխանաբար 7 տարի և 3 տարի առաջ իրենց մեծ գումարներ խոստանալով խաբեությամբ ներգրավել է մարմնավաճառության մեջ և ենթարկել սեռական շահագործման: Այս հաղորդումների հիման վրա 2010-ի նոյեմբերի 28-ին Համլետ Դավթյանը բերման է ենթարկվում ոստիկանության Կետրոնականի բաժին: Այդ պահին նրա հետ է լինում նաև Արման Միքայելյանը` Գոհար Գալստյանի որդին: Վերջինս համոզված է, որ Համլետ Դավթյանն այդ օրը միտումնավոր էր իր որդուն հրավիրել:
Ինչևէ, Համլետ Դավթյանին մեղադրանք է առաջադրվել ՀՀ քրեական օրենսգրքի 132-րդ հոդվածի 2-րդ մասով` այն բանի համար, որ նա սեռական շահագործման նպատակով հավաքագրել է աղջիկներ և նրանց պարտադրել պոռնկության: Իսկ Արման Միքայելյանին մեղադրում են Համլետին օժանդակելու մեջ: Ըստ Արման Միքայելյանի մոր՝ իր որդու` Համլետին օժանդակելու վերաբերյալ մեղադրանքը որևէ կետով հիմնավորված չէ:
Գործով ներգրավված են 3 տուժողներ, որոնցից 2-ը ներկայացել են դատարան, իսկ երրորդը` Հայաստանում չէ:
Սակայն հետաքրքիրն այն է, որ ըստ մեղադրանքի՝ հանցագործությունը գլխավորած անձը` Համլետ Դավթյանն, այժմ գտնվում է ազատության մեջ: Պատճառն այն է, որ նա ունի հիվանդություն, որը ներառված է կառավարության սահմանած` պատիժը կրելուն խոչընդոտող հիվանդությունների ցանկում, իսկ Արման Միքայելյանը, որին մեղադրում են նրան օժանդակելու մեջ, պահվում է կալանքի տակ:
Ներկայումս գործը քննվում է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում:
«Իմ միակ պահանջն այն է, որ տղաս մեղադրվի և պատասխան տա այն արարքի համար, որը քրեորեն կապացուցվի: Սակայն տեսնում եմ մեղադրողի և Ինեսայի վիճակը, որը մինչ օրս օժանդակող լինելով դեռ տուժող է համարվում: Իսկ մեղադրական եզրակացության ծավալը ոչ մի կերպ չի փոխվում: Ընդհակառակը` մեղադրողն է աղջիկներին հուշող հարցերով փորձում հիմնավորել մեղադրանքի ծավալը: Ուստի, ես այլ բանի չեմ սպասում»,- ասաց Գոհար Գալստյանը:
Արման Միքայելյանի մայրը համոզված է, որ այս ամբողջ գործը կազմակերպվել է դեռևս նախաքննական մարմնում: ՀՀ նախկին ոստիկանապետ Ալիկ Սարգսյանը, ըստ Գոհար Գալստյանի, Համլետ Դավթյանի հորեղբոր տղա Հրանտ Դավթյանի քավորն է, և նա է հովանավորել, որպեսզի Համլետ Դավթյանը ազատ արձակվի: «Այդ երեք օրը (երբ Համլետ Դավթյանը ձերբակալված է եղել) Դավթյան Հրանտը հեռու չի գնացել քննչական մարմինների դռներից, նա է այս պատմությունը փակել և թողել տղայիս վրա: Զաքյանի բնակարանը, որտեղ բնակվել են աղջիկները և վարել իրենց գործունեությունը, Հրանտ Դավթյանի բնակարանն է»,- ասաց Գոհար Գալստյանը:
Համլետ Դավթյանը դատական նիստերին ընդհանրապես չի ներկայանում` հիվանդության պատճառաբանությամբ: Սակայն Արման Միքայելյանի մոր խոսքով` նա հիմա այնպիսի վիճակում չէ, որ չկարողանա ներկայանալ դատական նիստերին:
Այս գործով հերթական դատական նիստը նշանակված է փետրվարի 3-ին:
