ИТАР-ТАСС-ի փոխանցմամբ՝ ԱՄՆ ազգային հետախուզության տնօրեն Ջեյմս Քլեփերը, երեկ ելույթ ունենալով ԱՄՆ-ի Սենատում, հայտարարել է, որ Իրանը տիրապետում է գիտական, տեխնոլոգիական ու արդյունաբերական պոտենցիալի՝ ատոմային ռումբի ստեղծման համար:
Քլեփերի խոսքերով՝ Իրանը շարունակում է ընդլայնել իր միջուկային տեխնոլոգիական հնարավորությունները, որպեսզի պատրաստ լինի միջուկային զենքի արտադրությանը՝ այդ մասին որոշում ընդունելու դեպքում. «Մենք չգիտենք՝ արդյոք Իրանը կվճռի՞ սկսել միջուկային զենքի արտադրություն:
Իրանը շարունակում է ընդլայնել ուրանի հարստացման իր հնարավորությունները, ինչը կարող է գործածվել թե՛ քաղաքացիական, թե՛ ռազմական նպատակների համար: ԱԷՄԳ-ի տվյալներով՝ նախորդ տարվա հոկտեմբերի վերջին Իրանն իր տրամադրության տակ ուներ մինչև 3.5 տոկոս հարստացված մոտ 4150 կիլոգրամ ուրան և մինչև 20 տոկոս հարստացված 80 կիլոգրամ ուրան:
Իրանի տեխնոլոգիական նվաճումները մեզ թույլ են տալիս գալու այն եզրակացության, որ համապատասխան որոշում կայացնելու դեպքում Թեհրանը կարող է այնպիսի քանակով արտադրել բարձր հարստացված ուրան, որն անհրաժեշտ է միջուկային զենքի ստեղծման համար:
ԱՄՆ հետախուզության կարծիքով՝ Իրանը, ամենայն հավանականությամբ, իր նախապատվությունը կտա հրթիռներին՝ միջուկային զենքը նպատակին հասցնելու փոխադրամիջոցին: Ներկայիս դրությամբ Իրանը ողջ Մերձավոր Արևելքում ունի ամենաշատ բալիստիկ հրթիռները և շարունակելու է կատարելագործել իր հրիթռային ուժերը»:
