ՀՀ սահմանային էլեկտրոնային կառավարման տեղեկատվական համակարգով ստացված տվյալներով՝ սահմանային անցման կետերով իրականացվող արտաքին ուղևորաշրջանառության համախառն ծավալը 2011 թ. հունվար-դեկտեմբերին կազմել է 3 մլրդ 934.1 հազ., 2010 թ.՝ 3 մլրդ 555.1 հազ. ուղևորության համեմատ:
Ազգային վիճակագրական ծառայության այսօր հրապարակած տվյալների համաձայն՝ ուղևորափոխադրումների հաշվեկշիռը (ժամանումների և մեկնումների տարբերությունը) 2011 թ. հունվար-դեկտեմբերին կազմել է -43.8 հազ., 2010 թ-ին արձանագրված՝ -46.7 հազարի համեմատ: Այսինքն՝ պաշտոնական վիճակագրության համաձայն անցած տարի մոտ 44 հազարով ավելի շատ մարդ է հեռացել հայաստանից, քան ժամանել է:
Սակայն, ուշագրավ է այն փաստը, որ ԱՎԾ-ի հրապարակած տվյալներով փոխվել է 2010 թվականի մեկնող-ժամանողների սալդոն: Մասնավորապես, ըստ ՀՀ տարածքային կառավարման նախարարության միգրացիոն պետական ծառայության հրապարակած տվյալների, 2010-ին բոլոր տեսակի տրանսպորտային միջոցներով մեկնող և ժամանողների բացասական հաշվեկշիռը կազմել է 29 հազար 860 ուղեւոր: ԱՎԾ-ն մեկնումների և ժամանումների թիվը փոխելով այն մոտ 30 հազարից հասցրել է մոտ 48 հազարի: Այսպիսով ԱՎԾ-ն կարողացել է սարքել մի վիճակագրություն, ըստ որի, 2011-ին արտագաղթի նվազում է արձանագրել:
Ընդ որում, ՀՀ սահմանային էլեկտրոնային կառավարման տեղեկատվական համակարգից ստացված տվյալների համաձայն՝ ժամանումների և մեկնումների քանակակազմերում 2011 թ. գերակշռել են ՀՀ քաղաքացիները, համապատասխանաբար` 53.4% և 54.7%, Վրաստանի քաղաքացիները`15.6% և 15.2%, ՌԴ քաղաքացիները`15.3% և 14.8%: Որոշակի մասնաբաժին են ունեցել նաև Իրանի քաղաքացիները, համապատասխանաբար`7.2% և 7.0%: Ինչպես ժամանումների, այնպես էլ մեկնումների քանակակազմերում տղամարդիկ կազմել են 66%, կանայք` 34%:
