Սիրիայի իշխանություններն ազատ են արձակել «Ալ-Քաիդայի» բարձրաստիճան անդամ Մուստաֆա Սետմարիամին (հայտնի է նաև Աբու Մուսաբ Ալ-Սուրի անունով): Այս մասին հայտնում է El Pais-ը` վկայակոչելով սեփական աղբյուրներին և Սիրիայի ընդդիմության ինտերնետ-ֆորումներին: Ահաբեկիչը բանտից ազատվել էր 2011 թվականի դեկտեմբերի վերջին:
Վերլուծաբանների կարծիքով՝ Սետմարիամին ազատ արձակելը Սիրիայի իշխանությունների կողմից խորհրդանշական ժեստ էր, որի նպատակն էր ցույց տալ, որ իրենք մտադիր չեն շարունակել ԱՄՆ-ի հետ համագործակցությունը ահաբեկչությա դեմ պայքարում: Այս քայլը ԱՄՆ-ի՝ Սիրիայի նկատմամբ կիրառված պատժամիջոցների պատասխանն էր:
Մուստաֆա Սետմարիամը, որը ծնվել էր Սիրիայում, սակայն ուներ Իսպանիայի քաղաքացիություն, համարվում է «Ալ-Քաիդայի» չորրորդ մարդը: Նա ձերբակալվեր է 2005 թվականին Պակիստանում և հանձնվել Սիրիային, որտեղ գտնվում էր հետախուզման մեջ` Սիրիայի Համա քաղաքում 1982 թվականի ըմբոստությանը մասնակցության համար:
Սետմարիամին փնտրում են նաև Իսպանիայի իշխանությունները: Նրան մեղավոր են համարում երկրում մի շարք ահաբեկչական գործողությունների, մասնավորապես՝ 1985 թվականին «Էլ-Դեսկանսո» ռեստորանում տեղի ունեցած պայթյունի, որին զոհ դարձավ 18 մարդ, մասնակից լինելու համար: Բացի այդ, Սետմարիամը որպես վկա է անցնում 2004 թվականի մարտի 11-ին Մադրիդում տեղի ունեցած պայթյունի գործով:
2011 թվականին «Ալ-Քաիդայի» առաջնորդ Այման Ալ-Զավահիրին պահանջել էր ազատ արձակել խմբավորման մի շարք ներկայացուցիչների, այդ թվում՝ նաև Սետմարիամին: Դրա փոխարեն Ալ-Զավահիրին առաջարկել էր բաց թողնել ԱՄՆ քաղաքացի Ուորեն Վայնստայնին, որին «Ալ-Քաիդան» փախցրել էր Պակիստանում: Հայտնի չէ՝ Սետմարիամի ազատարձակումը կապվա՞ծ է այս պահանջի հետ, թե՞ ոչ:
