Մանկապղծության համար 15 տարվա ազատազրկման դատապարտված Սերոբ Տեր-Պողոսյանին այս շաբաթ չեն վիրահատի: Ամենայն հավանականությամբ նրան կվիրահատեն հաջորդ շաբաթվա սկզբին: Այս մասին «Առաջին լրատվական»-ին ասաց Ա. Միքայելյանի անվան վիրաբուժության ինստիտուտի փոխտնօրեն Օնիկ Մելքոնյանը: «Վիրահատություն չի եղել, քանի որ ուրբաթ օրը նա պետք է մասնակցի դատական գործընթացի»,- ասաց նա:
Մեր հարցին՝ արդյոք Սերոբ Տեր-Պողոսյանի առողջական «ծանր» վիճակը թույլ կտա՞ նրան հետաձգել վիրահատության օրը, փոխտնօրենը նշեց, որ մանկապիղծի մոտ եղած աղիների անանցանելիությունը հաջողվել է բացել, այնպես որ՝ եթե նրա մոտ այս ընթացքում սուր երևույթներ չնկատվեն, հնարավոր կլինի վիրահատությունը մյուս շաբաթ կատարել:
Մանկապիղծի փաստաբան Գիվի Հովհաննիսյանից տեղեկացանք, որ Սերոբ Տեր-Պողոսյանը դատարան պետք է ներկայանա, քանի որ պետք է քննվի նրա վերաքննիչ բողոքը առաջին ատյանի դատարանի կայացրած դատավճռի դեմ:
Հիշեցնենք, որ Լոռու մարզի ընդհանուր իրավասության դատարանի կողմից մանկապղծության համար 15 տարի ազատազրկման դատապարտված Սերոբ-Տեր Պողոսյանը Ա. Միքայելյանի անվան վիրաբուժության ինստիտուտ է տեղափոխվել հունվարի 27-ին: Ըստ ավելի վաղ հայտնած տեղեկությունների` մանկապիղծին պետք է վիրահատեին հունվարի 27-ին առավոտյան, քանի որ տառապում է աղիքային քաղցկեղով, ինչի համար նախկինում նա ԱՄՆ-ում բուժվել է: