«Առաջին լրատվական»-ի տեղեկություններով, այն բանից հետո, երբ անցած տարվա վերջին Կարեն Բաբայանը, որն առավել հայտնի է Շերիֆ մականունով, նշանակվեց «Զվարթնոց» օդանավակայանի անվտանգության ծառայության պետ, այս կառույցը հայտնվել է ոստիկանության հատուկ ուշադրության կենտրոնում:
Կարեն Բաբայանը ՀՀ ոստիկանապետ Վովա Գասպարյանի նախկին կադրերից է և երկար տարիներ աշխատել է վերջինիս ենթակայությամբ` ռազմական ոստիկանությունում: Հետագայում Կարեն Բաբայանը ռազմական ոստիկանությունից դուրս եկավ, իսկ որոշ ժամանակ անց հայտնվեց ոստիկանության համակարգում: Մինչև Վովա Գասպարյանի ՀՀ ոստիկանապետ նշանակվելը Կարեն Բաբայանը զբաղեցնում էր ՀՀ ոստիկանության «Զվարթնոցի» գծային բաժնի պետի պաշտոնը:
Վովա Գասպարյանի ոստիկանապետ նշանակվելուց անմիջապես հետո Բաբայանը սեփական դիմումի համաձայն ոստիկանության համակարգից դուրս եկավ: Դեկտեմբերի վերջին հայտնի դարձավ, որ Կարեն Բաբայանը նշանակվել է «Զվարթնոցի» անվտանգության ծառայության պետ:
Պարզվում է, որ Շերիֆի նոր պաշտոնում նշանակումից մեկ ամիս էլ չանցած ոստիկանությունը «Զվարթնոցի» միանգամից երկու աշխատակցի դեմ քրեական գործ է հարուցել: Մասնավորապես, օրերս հայտնի դարձավ, որ հունվարի 20-ին ոստիկանության աշխատակիցները կաշառք վերցնելու պահին ձերբակալել են «Զվարթնոց» օդանավակայանի երկու աշխատակիցների:
Կաշառք վերցնելու մեջ մեղադրվողներից մեկը «Զվարթնոց» օդանավակայանի սպասարկման ծառայության վերահսկիչ Տիգրան Գասպարյանն ուղևորներից մեկից 15 հազար դրամ է պահանջել` թույլատրվածից ավել ուղեբեռը չգրանցելու համար: Այս մասին «Առաջին լրատվական»-ին տեղեկացրին ՀՀ ոստիկանության հասրակայնության հետ կապերի և լրատվության վարչությունից:
Ըստ ոստիկանության՝ Ռուսաստան մեկնող զույգին առաջարկվել է 53 կգ ուղեբեռը թույլատրելի 41 կգ գրանցելու դիմաց վճարել 15 հազար դրամ` նախատեսված օրինական 30 հազար դրամ վճարի փոխարեն: Գործարքը, սակայն, չի կայացել, քանի որ գրանցում կատարելուց հետո ոստիկանները գրանցում կատարող աշխատակցին՝ Տիգրան Գասպարյանին և ՌԴ մեկնել պատրաստվող ուղևորներին հրավիրել են ոստիկանության գծային բաժին, և եղելությունն ամբողջությամբ բացահայտվել է:
