ՀՀ սոցիալական ապահովության պետական ծառայությունում ի հայտ եկած չարաշահումների փաստի առիթով ՀՀ ոստիկանության քննչական գլխավոր վարչությունում հարուցված քրեական գործի նախաքննությունը դեռևս շարունակվում է, և հայտնի չէ, թե նախաքննությունը երբ կավարտվի: Այս մասին «Առաջին լրատվական»-ի հետ զրույցում ասացին ՀՀ ոստիկանության հասարակայնության հետ կապերի և լրատվության վարչությունից:
Հիշեցնենք, որ այս գործով հարցաքննվել են բազմաթիվ անձինք, մեղադրանք է առաջադրվել երկու տասնյակից ավել անձանց, որոնց մեծ մասը հանրապետությունից չբացակայելու ստորագրությամբ ազատ են արձակվել: Գործով կալանավորված է միայն Նոր Նորքի տարածքային կառույցի պետի տեղակալը՝ Արթուր Սուքիասյանը: Այս գործը նաև Աշխատանքի և սոցիալական հարցերի նախարարության սոցիալական ապահովության նախկին պետ Վազգեն Խաչիկյանի աղմկոտ պաշտոնանկության պատճառ դարձավ:
