Ռուսական Regnum լրատվական գործակալության փոխանցմամբ, Ադրբեջանի Միլլի մեջլիսի (խորհրդարան) փոխխոսնակ Բահար Մուրադովան այսօր տեղի ունեցած մամլո ասուլիսի ժամանակ հայտարարել է, թե Ադրբեջանի նախագահն իր դիրքորոշումը «հայտնել է» Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունմանը.
«Ադրբեջանի խորհրդարանն ու կառավարությունը բոլոր ջանքերը գործադրել են այդ օրինագծի ընդունումը կանխելու համար: Ադրբեջանի ԱԳՆ-ն և Միլլի Մեջլիսը հանդես են եկել այդ կապակցությամբ հայտարարություններով, Բաքվում Ֆրանսիայի դեսպանին բողոքի նոտա է ներկայացվել, խորհրդարանի պատգամավորներից յուրաքանչյուրը դիմել է ֆրանսիացի պատգամավորներին: Ադրբեջանը ևս մեկ անգամ ապացուցել է, որ նա Թուրքիայի կողքին է և աջակցում է նրան:
Սակայն մյուս կողմից էլ պետք է բոլոր ջանքերն ուղղել Ֆրանսիայի հետ լավ հարաբերությունների պահպանմանը: Պետք չէ մի խումբ ֆրանսիացի պատգամավորների պատճառով փչացնել դրանք: Եթե ուշադիր եք եղել, ապա Թուրքիան ինքն էլ է սպասողական դիրքորոշում որդեգրել Ֆրանսիայի հետ հանդեպ և գործում է քայլ առ քայլ:
Ինչ վերաբերում է Անկարայի այն հայտարարությանը, թե անհրաժեշտ է Ֆրանսիային բացառել ԵԱՀԿ Մինսկի խմբի կազմից և նրա փոխարեն դրանում ընդգրկել Թուրքիային, ապա դա լրիվ տրամաբանական է: Թուրքիան իրավունք ունի այդ հարցում իր դիրքորոշումն ունենալու: Սակայն այդ խնդիրը պետք է լուծվի ԵԱՀԿ Մինսկի խմբի կանոնադրության շրջանակներում»:
Հիշեցնենք, որ ավելի վաղ թուրքական լրատվամիջոցներն Ադրբեջանի նախագահ Իլհամ Ալիևին մեղադրել էին Ֆրանսիայի Սենատի ընդունած որոշման վերաբերյալ լռություն պահպանելու մեջ: