Հունվարի 27-ին «ԱրմենՏել» ընկերության Beeline համալսարանում անցկացվել է կադրերի կառավարման մասնագետների փորձի փոխանակման կլոր սեղան, որը կազմակերպվել էր «ԱրմենՏել» ՓԲԸ մարդկային ռեսուրսների կառավարման և կազմակերպական զարգացման տնօրինության և Հայաստանի HR-մասնագետների ասոցիացիայի կողմից:
Կլոր սեղանի աշխատանքներին մասնակցել են հայաստանյան շուրջ 20 խոշոր ընկերությունների, փոքր և միջին ձեռնարկությունների ներկայացուցիչներ:
«ԱրմենՏել» ընկերության HR-մասնագետները գործընկերներին ներկայացրել են լավագույն փորձը, ինչպես նաև «ՎիմպելԿոմ» ընկերությունների խմբում կիրառվող կադրերի համալրման, մասնագիտական զարգացման, աշխատակազմի խրախուսման և գնահատման տեխնոլոգիաները:
«Հանդիսանալով Հայաստանի խոշորագույն գործատուներից մեկը, «ԱրմենՏել» ընկերությունը ողջունում է այնպիսի միջոցառումներ, որոնց շրջանակում տարբեր ընկերությունների մասնագետները փոխանակում են աշխատակազմի հետ աշխատանքի փորձը: Նման նախաձեռնությունները նպաստում են Հայաստանի HR-մասնագետների համախմբմանը` կադրային կառավարման ոլորտում արդի խնդիրները քննարկելու և լուծելու նպատակով:
Դրանք վկայում են, որ Հայաստանում գործարար միջավայրն իր զարգացման առումով թևակոխել է որակապես նոր փուլ»,- նշել է «ԱրմենՏել» ՓԲԸ մարդկային ռեսուրսների կառավարման և կազմակերպական զարգացման տնօրեն Լիանա Խաչատրյանը:
«Մենք շնորհակալ ենք «ԱրմենՏել» ընկերությանը միջոցառումը կազմակերպելու, բաց քննարկումների և համագործակցելու համար: «ԱրմենՏել»-ը երկրի առանցքային գործատուներից է. այդ պատճառով մեզ համար հատկապես արժեքավոր է, որ ընկերության HR-ղեկավարությունն իր լուման է ներդնում մեր ասոցիացիայի ձևավորման և կայացման գործում: Մեր ընդհանուր նպատակն է Հայաստանում HR ոլորտի զարգացումը»,- ասել է HR ասոցիացիայի խորհրդի նախագահ Արփի Կարապետյանը:
Մարդկային ռեսուրսների կառավարման հասարակական կազմակերպությունը հիմնադրվել է 2010թ. մայիսին:
«ԱրմենՏել» ընկերությունը ասոցիացիայի անդամ է 2011թ. սկզբից:
