ԱՄՆ նախագահի կինը՝ Միշել Օբաման, իր շուրջը ստեղծելով Սպիտակ տան տնտեսող կնոջ կերպար, Agent Provocateur հայտնի առևտրական ցանցի խանութներից մեկում էլիտար ներքնազգեստի վրա ծախսել է 50 հազար դոլար: Ինչպես հաղորդում է The Daily Telegraph պարբերականը, գնումներ կատարելիս նրան ընկերակցել է Կատարի շեյխի երկրորդ կինը՝ Մոզան:
Այդ ցանցում մեկ ապրանքի միջին գինը շուրջ 1600 դոլար է: Agent Provocateur-ի գործադիր տնօրեն Հարի Հոգարթի խոսքերով՝ իրենց այցելուների թվում քիչ չեն հայտնի մարդիկ, սակայն նրանց անունները հայտնել հրաժարվել է: Օբամայի և Մոզայի՝ նորաձևության խանութ այցելությունից հետո առևտրի ցանցի վաճառքն աճել է միանգամից 12.5%-ով:
Կնոջ կողմից այդպիսի վատնումները,- եթե դա իրոք ճիշտ է,- հազիվ թե ուրախացնեն Սպիտակ տան ղեկավարին նախագահական ընտրությունների նախաշեմին: Իր նախագահական քարոզարշավի ծրագրում Օբաման շեշտը դնում է հարուստներին հարկային արտոնություններից զրկելու վրա:
Նշենք, որ Միշել Օբաման բազմիցս դրսևորել է իր համեստությունը և տնտեսելու կարողությունը: Օրինակ՝ 2011 թ. փետրվարին NBC հեռուստաընկերության եթերում նա երևաց մոտ 34 դոլար արժողությամբ հասարակ զգեստով՝ նշելով, որ ինքը զգեստին մեծ նշանակություն չի տալիս, կարևորը հարմարավետությունն է:
