Նախքան ընտրությունները իշխանություններն ամեն ինչ կանեն գնաճը զսպելու համար: «Առաջին լրատվական»-ի հետ զրույցում կառավարման փորձագետ Հարություն Մեսրոբյանը կարծիք հայտնեց, որ արդեն սկսել են քայլեր ձեռնարկել այդ ուղղությամբ. «Անցած տարի մի քանի կոպեկով ջրի գինը իջեցրեցին, մի քիչ գազի գինն են իջեցնում: Դրանք անում են, որպեսզի արտադրվող ապրանքների գները ինչ-որ ձևով զսպեն, որովհետև պարզ է՝ և՛ ջուրն է մտնում ինքնարժեքի մեջ, և՛ էներգակիրները, և այլն»:
Հարցին, թե այդ դեպքում ընտրություններից հետո գների թռիչք պետք է սպասե՞լ, Հ. Մեսրոբյանը պատասխանեց, որ սպասվում է այն, ինչ տեսել ենք 1996-ից՝ «ընտրությունից առաջ լոլոներ, ընտրությունից հետո հիշողության կորուստ, հետո կրկին ընտրությունից առաջ լոլոներ, ընտրությունից հետո հիշողության կորուստ»: Նա վստահորեն կանխատեսեց, որ նույնն այս ընտրություններում կլինի: Փորձագետի խոսքով, ներդրված գումարը ետ բերելու համար գների թռիչքը հիմնականում լինում է խմբակային՝ ինչ-որ ժամանակ շաքարավազի, հետո կաթնամթերքի, հավկիթի և այլն: «Գների թռիչք լինում է 2 անգամով, հետո իջնում է 20%-ով, իջնելու դեպքում մատնացույց են անում իջեցումը, իսկ թռիչքի դեպքում հիշողության կորուստ են ունենում»,- նշեց Հ. Մեսրոբյանը:
