Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվել է Հայ ազգային կոնգրեսի երիտասարդ ակտիվիստներ Տիգրան Առաքելյանի, Սարգիս Գևորգյանի, Դավիթ Քիրամիջյանի և Արտակ Կարապետյանի գործով դատական նիստը:
Հիշեցնենք, որ օգոստոսի 9-ին ՀԱԿ-ի 7 ակտիվիստներ բերման էին ենթարկվել Երևանի Կարապի լճի հարակից տարածքում ոստիկանության աշխատակիցների հետ տեղի ունեցած միջադեպի հետևանքով: Բոլորը ձերբակալվել էին: Սահակ Մուրադյանը, Դավիթ Քիրամիջյանը, Արտակ Կարապետյանը, Սարգիս Գևորգյանը, Արեգ Գևորգյանը և Վահագն Գևորգյանը հետագայում ազատ էին արձակվել` հանրապետությունից չբացակայելու ստորագրությամբ: Իսկ Տիգրան Առաքելյանը մինչ օրս պահվում է կալանքի տակ:
Որպես տուժող հանդես եկող ՀՀ ոստիկանության աշխատակից Վարուժան Գասպարյանը խոստովանել է, որ ՀԱԿ-ի ակտիվիստներին բերման ենթարկելիս արձանագրություն չի կազմվել: Իսկ իր կողմից ապօրինություն թույլ տալու մեղքը նա փորձել է բարդել երիտասարդների և նրանց հարազատների վրա` ասելով, թե իբր երիտասարդներին բերման ենթարկելիս նրանց ընկերները և Սարգիս Գևորգյանի քույրն իրեն խանգարել են: Այսինքն, Գասպարյանը դատարանում ոստիկանությանը ներկայացել է մի այնպիսի խեղճ վիճակով, որ իբր իրենք այնքան անպաշտպան են եղել, որ անգամ չեն կարողացել արձանագրություն կազմել, որովհետև իրենց խանգարել են:
Գործով հանդես եկող մյուս տուժողը` ոստիկանության աշխատակից Տիգրան Ավետիսյանը, ոստիկանների կերպարն ընդհանրապես լացացնող է դարձրել: Նա հայտարարել է, թե իբր բերման ենթարկվելուց հետո Տիգրան Առաքելյանը մեքենայի մեջ գլխով հարվածել և կոտրել է իր քիթը: Իբր Առաքելյանն ասել է, որ իրեն լավ չի զգում և Ավետիսյանը թուլացրել է նրա ձեռքերը, որ մինչ այդ ինքը բռնած է եղել, որից հետո, ըստ ոստիկանի, Առաքելյանը հարվածել է իր քթին: Իհարկե, Ավետիսյանը չի պարզաբանել, թե այդ երբվանից է ոստիկանությունը սկսել բերման ենթարկվածներին ավտոմեքենայում ձեռնաշղթա հագցնելու փոխարեն «գրկած» տանել:
Ինչևէ, ոստիկանը հերքել է Առաքելյանի այն պնդումը, որ մեքենայի մեջ Ավետիսյանն իր կոկորդից բռնել է այնպես, որ ինքը սկսել է շնչահեղձ լինել: Ինչպե՞ս կարող է Հայաստանի ոստիկանը մարդուն շնչահեղձ անել:
Հաջորդ դատական նիստը նշանակվել է հունվարի 31-ին, ժամը 12.00-ին:
