ՀՀ արդարադատության նախարարության քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի կողմից հրատապ հաշվետվություն է ներկայացվել ՀՀ արդարադատության նախարարությանը «Էրեբունի» քաղաքացիական հիվանդանոց տեղափոխված դատապարտյալ Հ.Ա.-ի մասին: Ըստ հաղորդագրության՝ դատապարտյալը տառապում է ՀՀ կառավարության թիվ 825-Ն որոշմամբ ամրագրված պատիժը կրելուն խոչընդոտող ծանր հիվանդությամբ և այժմ գտնվում է առողջական ծայրահեղ ծանր վիճակում: «Էրեբունի» քաղաքացիական հիվանդանոց տեղափոխված դատապարտյալ Հ.Ա.-ն տառապում է դիլատացիոն կարդիոմիոպաթիայով:
Դիտորդական խումբը նախարարին խնդրել է հաշվի առնելով Ա.-ի ծանր առողջական վիճակը՝ անհապաղ հանձնարարել, որպեսզի սկսվի դատապարտյալի ազատ արձակման գործընթացը:
«Միաժամանակ ակնկալում եմ Ձեր միջամտությունը, որպեսզի միջգերատեսչական հանձնաժողովի դեռևս չկանոնակարգված աշխատանքային գործելաոճը և օրենսդրական անկատարությունը խոչընդոտ չհանդիսանան դատապարտյալի իրավունքների և ազատությունների պետության կողմից ստանձնած պաշտպանության իրականացման հույժ պատասխանատու գործում»,- նշված է նախարարին հասցեագրված դիտորդական խմբի նամակում:
