Թուրքական Bianet կայքի փոխանցմամբ՝ Թուրքիայում փոփոխություններ են կատարվել թիվ 5683 օրենքում, որն առնչվում է Թուրքիայում օտարերկրացիների բնակությանՆ ու ճանապարհորդությանը:
Ըստ այդ ուղղումների՝ օտարազգիները Թուրքիայի տարածքում կարող են գտնվել 90 օր շարունակ, ապա ստիպված կլինեն լքել երկիրը: Նրանք կարող են նույն տարում Թուրքիա վերադառնալ նույն ժամկետով: Ստացվում է, որ օտարազգիները Թուրքիայի տարածքում մեկ տարվա մեջ կարող են գտնվել առավելագույնը 6 ամիս: Աշխատանքային միգրանտների ներհոսքի դեմ կատարված այդ ուղղումներն ուժի մեջ կմտնեն փետրվարի 1-ին:
Սոցիալական օգնության ու համերաշխության միության (Göç-Der) նախագահ Շեֆիքա Գյուրբուզը հայտարարել է, որ իշխանություններն այս քայլին են գնում ապօրինի ներգաղթյալների հոսքի դեմն առնելու և թուրք քաղաքացիներին աշխատանքի տեղավորելու հարցը հեշտացնելու համար:
Գյուրբուզը, ընդգծելով, որ այս փոփոխություններն ազդելու են Թուրքիայում աշխատող մոտ 100,000 հայաստանցիների վրա, հայտարարել է, որ այս օրենքի ընդունումը պայմանավորված է նաև Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունմամբ:
Այդ փոփոխություններն ազդելու են նաև Թուրքմենստանի, Վրաստանի, Ադրբեջանի, Ուկրաինայի, Մոլդովայի, Ինդոնեզիայի և այլ երկրների քաղաքացիների վրա:
Հիշեցնենք, որ ավելի վաղ՝ 2010 թվականի մարտին և 2011 թվականի ապրիլին, Էրդողանը սպառնացել է վտարել Թուրքիայում ապօրինի աշխատող հայերին:
Ի դեպ, Վրաստանի նախագահ Միխեիլ Սաակաշվիլին, որը օրեր առաջ Թուրքիայում էր, փորձել էր թուրքական կողմի հետ պայմանավորվել, որ վերոնշյալ փոփոխությունները չտարածվեն Վրաստանի քաղաքացիների վրա, սակայն մերժում էր ստացել: