Հունվարի 27-ին աշխարհը նշում է Հոլոքոստի զոհերի հիշատակի միջազգային օրը: Այդ օրը խորհրդային բանակն ազատագրեց Օսվենցիմ համակենտրոնացման ճամբարի բանտարկյալներին:
2005 թվականի նոյեմբերի 1-ին ՄԱԿ-ի ընդունած 60/7 բանաձևը քննադատում է Հոլոքոստի ժխտումը և բոլոր երկրներին կոչ է անում հարգանքի տուրք մատուցել զոհերին:
Հոլոքոստի զոհերի հիշատակի միջազգային օրը նշվում է վեցերորդ անգամ: 2007 թվականի հունվարի 26-ին ՄԱԿ-ի Գերագույն ասամբլեան ընդունել էր 61/255 բանաձև, որով դատապարտվում է հրեաների Հոլոքոստի` որպես պատմական փաստի ժխտումը:
Հունվարի վերջին շաբաթը աշխարհի տարբեր երկրներում կազմակերպվում են սգո արարողություններ` նվիրված Հոլոքստի զոհերի հիշատակին: Հրեա ժողովրդի ողբերգության մասին հիշում են նաև Գերմանիայի Բունդեսթագում: Նյու Յորքում` ՄԱԿ-ի գրասենյակում, կազմակերպում են հատուկ միջոցառում` նվիրված Հոլոքոստին զոհ գնացած երեխաների հիշատակին:
Երկրորդ համաշխարհային պատերազմի ժամանակ ոչնչացվել է մոտ 6 միլիոն հրեա, սակայն Կրակով քաղաքում նացիստները սպանել են ամենաշատ հրեաների: Այդ պատճառով եվրոպացիները Հոլոքստի օրը նշում են կամ Կրակովում, կամ Բրյուսելում:
Օսվենցիմում պահվում էր մոտ 4 միլիոն բանտարկյալ, որից 2.5 միլիոնը մահացել են գազային խցիկներում, իսկ 500 հազարը՝ տարբեր հիվանդություններից:
Իսրայելում և աշխարհում տարբեր հրեական համայնքներում ողբերգության օրը նշվում է ապրիլի 27-ին (1943 թվականի այդ օրը Վարշավայի գետոյում սկսվեց ապստամբությունը): Այս տարի Յոմ հա-Շոան նշելու են ապրիլի 19-ին:
Հիշեցնենք, որ հունվարի 26-ին Եվրախորհրդարանի բրուսելյան նստավայրը հարգանքի տուրք է մատուցել Հոլոքստի զոհերին` կոչ անելով համաշխարհային հանրությանը թույլ չտալ, որպեսզի ապագայում կրկնվի նման աղետ:
