Հայկական բանակն օր օրի ավելի է հզորանում և դառնում մեր երկրում խաղաղության պահպանման երաշխավորը: Այսօր կայացած մամուլի ասուլիսի ժամանակ այս մասին ասաց ՀՀԿ-ական պատգամավոր Գագիկ Մելիքյանը:
Նա նաև շնորհակալություն հայտնեց Ֆրանսիայի Սենատին` նշելով, որ Հայոց ցեղասպանության ժխտումը քրեականացնող հայտնի օրինագծի ընդունման համար ձեռնարկվեցին բոլոր քայլերը:
«Ֆրանսիական Սենատի քայլն ապացուցեց այդ երկրի նվիրվածությունը ժողովրդավարությանն ու համամարդկային արժեքներին: Հուսով եմ` Ֆրանսիային կհետևեն աշխարհի մի շարք այլ երկրներ: Միաժամանակ, Թուրքիան ապացուցեց իր վարած ժխտողական քաղաքականության սնանկությունը: Համոզված եմ` Ֆրանսիայի Սենատի կողմից ընդունված օրինագիծը ապտակ էր Թուրքիային, որից, սակայն, թուրք-ֆրանսիական հարաբերությունները չեն սրվի»,- կարծիք հայտնեց Գագիկ Մելիքյանը` ավելացնելով, որ թուրքերն իրենց մուղամները լսելով` այդպես էլ «հարիֆ» կմնան:
«Առաջին լրատվական»-ի դիտարկմանը, թե ԱՄՆ պետքարտուղար Հիլարի Քլինթոնը հայտարարել է` ԱՄՆ-ը չի հետևի ֆրանսիական Սենատի քայլին, ՀՀԿ-ական պատգամավորը նշեց. «Քլինթոնը չի ասել, որ ԱՄՆ-ը չի ճանաչի Հայոց ցեղասպանությունը, ուղղակի նշել է, որ Ֆրանսիայի նման՝ Ցեղասպանության ժխտումը քրեականացնող օրինագիծ չի ընդունի»:
Հիշեցնենք, որ Ֆրանսիայի Սենատը հունվարի 23-ին Հայոց ցեղասպանության ժխտումը քրեականացնող օրինագիծ էր ընդունել, որը ենթադրում է մեկ տարվա ազատազրկում և 45 հազար եվրո տուգանք:
