Երեք տարի ժամկետով Երևանը դառնալու է իններորդ քաղաքը, որտեղ հյուրընկալվելու է Բոլոնիայի գործընթացի քարտուղարությունը։ Այս մասին այսօր ՀՀ կառավարության նիստում տեղեկացրել է կրթության և գիտության նախարար Արմեն Աշոտյանը:
Նրա խոսքով` այս տարվա հունիսից ձևավորվելու է քարտուղարության հայկական ազգային թիմը, որը մինչև 2015 թվականի հունիսը կիրականացնի իր պարտավորությունները։ Հայաստանն այս առումով ԱՊՀ-ում առաջին և Արևելյան Եվրոպայում երկրորդ երկիրն է, որ հյուրընկալում է Բոլոնյան գործընթացի քարտուղարությանը։
«Աշխատանքների կազմակերպման համար պետբյուջեով նախատեսվել են գումարներ, միջոցներ ենք ստանալու նաև գրանտային տեսքով։ Խնդրո առարկայի նկատմամբ հետաքրքրություն են ցուցաբերում նաև գործարարները», – ասել է նախարարը։
ՀՀ սպորտի և երիտասարդության հարցերի նախարարին վարչապետը հարցրել է` ինչպե՞ս է ընթանում օլիմպիական խաղերի նախապատրաստությունը։ Նշելով, որ այդ աշխատանքն ընթացքի մեջ է, նախարարը հավաստիացրել է, որ Հայաստանի մարզիկներն ամենայն պատասխանատվությամբ են պատրաստվում օլիմպիադային և կձգտեն հասնել լավ արդյունքների։
Գործադիրը քննության է առել «Ազգային ժողովի կանոնակարգ» օրենքում փոփոխություններ և լրացումներ կատարելու մասին օրենքի նախագիծը, որն օրենսդրական նախաձեռնության կարգով ներկայացրել է ԱԺ պատգամավոր Դավիթ Հարությունյանը։
Օրինագծի նպատակը, ըստ հեղինակի, օրենսդրական գործընթացում գլխադասային հանձնաժողովների վերահսկողական գործառույթների ընդլայնումը և դրանց դերի բարձրացումն է։ Կառավարությունն իր հերթին արել է մի շարք առաջարկներ, որոնց ընդունման դեպքում ընդունելի կհամարի օրենքի նախագիծը։ Օրինագիծը և կառավարության եզրակացությունը սահմանված կարգով կներկայացվեն ՀՀ Ազգային ժողով։