Մեծ Բրիտանիան, Ֆրանսիան և ԱՄՆ-ը երեքշաբթի օրը ՄԱԿ-ի Անվտանգության խորհրդի նիստում դատապարտել են Ռուսաստանի կողմից Սիրիային զենքի վաճառքը՝ հայտարարելով, որ այդ գործողությունները նպաստում են երկրում ճնշումների տարածմանը:
Ուղղակիորեն չշեշտելով Մոսկվայի անունը, բայց հստակ ակնարկելով, որ իրենք նկատի ունեն հենց Ռուսաստանին, ՄԵրձավոր Արևելքի դրությանը նվիրված ՄԱԿ-ի ԱԽ նիստում իրենց ելույթներում արևմտյան երեք խոշոր տերությունների ներկայացուցիչները քննադատության են ենթարկել Մոսկվայի և Դամասկոսի միջև զենքի առքուվաճառքի պայմանագրերը:
Ռուսաստանն ուշարդրության կենտրոնում հայտնվեց այն բանից հետո, երբ զենքով բեռնված ռուսական նավը մտավ Սիրիայի Տարտուս նավահանգիստ, իսկ բոլորովին վերջերս Ռուսաստանի կառավարությունը պայմանագիր կնքեց ՍԻրիայի հետ նրան 500 մլն դոլար ընդհանուր արժեքով 36 կործանիչ վաճառելու վերաբերյալ:
ՄԱԿ-ում ԱՄՆ ներկայացուցիչ Սյուզան Ռայսը հայտարարել է, որ Վաշինգտոնին անհանգստացնում են Սիրիայի նախագահ Բաշար Ալ-Ասադի կառավարությանը զենք և զինամթերք փոխանցելու լուրերը:
«Մենք կոչ ենք անում մատակարար-երկրներին կամավոր դադարեցնել այդ վարչակարգին զենքի մատակարարումը: Մենք կոչ ենք անում բոլոր երկրներին լրացուցիչ ջանքեր գործադրել՝ Ասադի վարպչակարգին զենքի մատակարարման գործընթացը դադարեցնելու համար»,- Ռայսի խոսքերը մեջբերում է «Ամերիկայի ձայնը»:
Մեծ Բրիտանիայի ներկայացուցիչ Մարկ Լայլ Գրանթը հայտարարել է, թե իր կառավարությունն անհանգստացած է, որ Սիրիա զենք է մտնում: «Միանգամայն ակնհայտ է, որ այդքան անկայուն և վտանգավոր իրավիճակում զենքի մատակարարումը անպատասխանատու գործողություն է, որը կհանգեցնի հետագա արյունահեղության»,- ընդգծել է Լայլ Գրանթը:
Ֆրանսիայի ներկլայացուցիչ Ժերար Արոն ավելի կոշտ է արտահայտվել՝ կոչ անելով էմբարգո դնել Սիրիա զենքի մատակարարման վրա և հիշեցնելով, որ Սիրիա զենք է մտնում նաև Իրանից: «Անթույլատրելի է, որպեսզի երկրները, այդ թվում՝ Անվտանգության խորհրդի անդամները, շարունակեն միջոցներ մատակարարել, որոնց օգնութամբ շարունակվում է բռնությունը Սիրիայի խաղաղ բնակչության նկատմամբ»,- ասել է Արոն:
