Ըստ ՀՀ արդարադատության նախարար Հրայր Թովմասյանի` այս տարվա աշխատանքի ամենակարևոր մասը գերատեսչության աշխատակիցներին հնարավորինս լավ աշխատանքային պայմաններով ապահովելն է: Այսօր կայացած մամուլի ասուլիսի ժամանակ այս մասին ասաց ինքը`ՀՀ արդարադատության նախարարը:
«Նախարարության որոշ աշխատակիցներ արդեն իսկ հաճախում են անգլերենի խորացված դասընթացների, ոմանք համաֆինանսավորմամբ`մարզադահլիճներ: Տարվա ընթացքում նախարարության աշխատակիցների մի մասը կապահովվի տրանսպորտային միջոցներով, ամուսնանալու դեպքում նրանց համար կսահմանվեն պարգևավճարներ: Սրանք խրախուսման մոդելներ են, որոնք թույլ կտան աշխատողներին իրենց ավելի գնահատված զգալ:
Գլխավոր խնդիրը շարունակելու է մնալ հանրության հետ շփում ապահովող ծառայությունների աշխատանքի որակի բարձրացումը: Մեր նպատակն է, որ բյուրոկրատական քաշքշուկներն արդարադատության նախարարությունում վերանան, գործարքները կատարվեն արագ ու արդյունավետ:
Բարեփոխումներ են նախատեսվում նոտարական համակարգում և ՔԱԳՎ-ի աշխատանքում: Մեր հաջորդ կարևորագույն խնդիրը դատական իշխանության հանդեպ ՀՀ քաղաքացիների անվստահության աստիճանի նվազեցմանը նպաստելն է»,- նկատեց Հրայր Թովմասյանը:
Նախարարի խոսքով՝ նաև ՔԿՀ-ներում է անհրաժեշտ կատարել համակարգային փոփոխություններ: «Լուծման կարիք ունեցող հարց է հատկապես ՔԿՀ-ներում պահվող մարդկանց զբաղվածության հարցը: Մինչև այս տարվա կեսը բոլոր ՔԿՀ-ներում կլինեն համակարգչային սենյակներ, որտեղ մասնագետները դատապարտյալներին կսովորեցնեն օգտվել համակարգչից:
Նաև պայմանավորվածություն կա աշխարհահռչակ հայ շախմատիստ Լևոն Արոնյանի հետ, ով իրեն հարմար ժամանակ կարող է շախմատային հանդիպումներ կազմակերպել դատապարտյալների միջև:
ՔԿՀ-ների մյուս չլուծված խնդիրը շենքային վատթար պայմաններն են, որոնք շտապ բարելավման կարիք ունեն: Հեռահար նպատակներից է նոր տիպի մի քանի ՔԿՀ-ներ ունենալը»,- ասաց Թովմասյանը: