2010 թվականին ԱՄՆ-ում տպագրված Ստեփան Փարթամյանի գիրքը նվիրված է ԱՄՆ-ում ամերիկահայերի ունեցած ներդրմանը: Գրքում զետեղված են 1908 թվականից մինչև 2010 թվականը ԱՄՆ-ում ապրած հայերի իրականացրած գյուտերի արտոնագրերի պատճենները և դրանց մասին տեղեկատվությունը: «Սարդարապատ» շարժման նախաձեռնող անդամ Տիգրան Խզմալյանը, ներկայացնելով գիրքը, ասաց, որ իրենք ցանկանում են հիշեցնել, թե ինչի է ընդունակ հայ ժողովուրդը ազատության և արդարության պայմաններում: Ստեփան Փարթամյանի գրքում ներկայացված են ամերիկահայերի այնպիսի գյուտեր, ինչպիսիք են 1908 թվականին Գաբրիել Կալանջյանի մազերի չորացման սարքի գյուտը: Ասատուր Սարաֆյանը, որը հայտնի է Օսկար Բենկեր անունով, հայտնագործել է ինքնաշարժերի ավտոմատ փոխանցման տուփը, բենզինի պոմպը, ավտոյուղի չափիչը և բազմագույն տպիչ սարքը: Օդաչուների համար թթվածնային դիմակը հայտնագործել է ամերիկահայ Արթուր Բուլբուլյանը: Բոլորին հայտնի Ալեք Մանուկյանին է պատկանում ջրի ծորակի գյուտը: Ստեփան Ստեփանյանը 1935 թվականին հայտնագործել է բեռնատարի թափքի վրա տեղադրվող բետոնախառնիչ սարքը: 1980 թվականին Արտաշես Հակոբյանը հայտնագործել է այսօր մեծ կիրառում գտած ճկուն ծայրով ձողիկը:
