Այսօր՝ հունվարի 24-ին` ժամը 11:00-ին հրավիրված նիստում Սահմանադրական դատարանը կլսի լեյտենանտ Արտակ Նազարյանի մոր՝ Հասմիկ Հովհաննիսյանի դիմումի հիման վրա գրավոր ընթացակարգ ընդունած՝ ՀՀ քրեական դատավարության օրենսգրքի 59-րդ հոդվածի 1-ին մասի 9-րդ կետի՝ «Նախաքննության ավարտման պահից» դրույթի և 201-րդ հոդվածի 1-ին մասի՝ Հայաստանի Հանրապետության Սահմանադրությանը համապատասխանության հարցը որոշելու վերաբերյալ գործը:
Ծովինար Նազարյանն «Առաջին լրատվական»-ին տեղեկացնում է, որ իր եղբոր` Արտակ Նազարյանի մահվան գործով նախաքննության ընթացքում նախաքննական մարմինն իրենց տրամադրել է միայն օրենքով նախատեսված եզակի նյութեր, հիմնականում՝ փորձաքննություններ անցկացնելու որոշումները և դրանց արդյունքները:
Դրա հետևանքով տուժող կողմը զրկված է մնացել նախաքննությանը մասնակցությունից: Նյութերը մերժելիս նախաքննական մարմինը հղում էր անում 201-րդ հոդվածին՝ նախաքննության գաղտնիքին, մինչդեռ նյութերը տրամադրելը կարող է կատարվել նախաքննության գաղտնիության պահպանման պայմանով:
«Այս հարցով մեր կողմի բողոքը անցել է Առաջին ատյանի, Վերաքննիչ և Վճռաբեկ դատարաններով և մերժվել է: Սահմանադրական դատարանում վիճարկվող խնդիրը սկզբունքային է ոչ միայն Արտակ Նազարյանի գործի, այլև ընդհանրապես ցանկացած գործով վարվող նախաքննությունում տուժող կողմի մասնակցության համար»,- տեղեկացնում է Ծ. Նազարյանը:
