Սոչիում այսօր նախատեսվող՝ Հայաստանի, Ռուսաստանի և Ադրբեջանի նախագահների եռակողմ հանդիպումից առաջ ՌԴ նախագահ Դմիտրի Մեդվեդևը և ՀՀ նախագահ Սերժ Սարգսյանը քննարկել են երկկողմ հարաբերություններին և տարածաշրջանային խնդիրներին վերաբերող հարցեր: Այս մասին հաղորդում է РИА Новости-ն:
«Ձեզ մոտ բարի ավանդույթ է ձևավորվել ձմռանն այստեղ՝ Սոչիում՝ լեռներում հանդիպել, և ես դրանում տեսնում եմ մի շարք բարի խորհրդանիշներ»,- հայտարարել է Մեդվեդևը՝ բացելով զրույցը:
Մեդվեդևը հիշեցրել է, որ անցյալ տարին վատ չի ավարտվել ապրանքաշրջանառության տեսանկյունից, երկու երկրների միջև գործնական կապեր են զարգանում:
Եկկողմ հարաբերություններից բացի՝ նա առաջարկել է քննարկել տարածաշրջանային խնդիրներ: «Մի շարք ոչ հեշտ մարտահրավերներ կան, այդ թվում՝ տարածաշրջանում»,- նշել է նա:
Իր կողմից ՀՀ նախագահ Սերժ Սարգսյանն այսպիսի հանդիպումները «շատ օգտակար» է համարել:
«Շնորհակալություն այն ջանքերի համար, որոնք Դուք գործադրում եք Լեռնային Ղարաբաղի խնդրի լուծման համար,- ասել է նա Մեդվեդևին։- Այս հանդիպումները և այն ժամանակը, որ Դուք հատկացնում եք այդ աշխատանքին, հնարավորություն են տալիս ունենալ քիչ թե շատ վերահսկվող իրավիճակ»:
Սարգսյանը նշել է, որ այդ հանդիպումը նաև լավ հնարավորություն է տալիս քննարկելու երկկողմ հարաբերությունները, որոնք նույնպես դրական են զարգանում: «Շնորհակալություն մեծ նախագծեր քննարկելու Ձեր պատրաստակամության համար»,- ասել է նա:
Այսօր ավելի ուշ Մեդվեդևը կհանդիպի նաև Ադրբեջանի նախագահ Իլհամ Ալիևի հետ, որից հետո տեղի կունենա նախագահների եռակողմ հանդիպումը: