Ժողովրդավարության և մարդու իրավունքների ոլորտում համակարգային փոփոխություններ են անհրաժեշտ: «Առաջին լրատվական»-ի հետ զրույցում նման տեսակետ հայտնեց Հելսինկյան կոմիտեի նախագահ, իրավապաշտպան Ավետիք Իշխանյանը`անդրադառնալով երեկ միջազգային Freedom House իրավապաշտպան կազմակերպության հրապարակած զեկույցին:
Զեկույցում ասվում էր, որ է 2011 թ. Հայաստանը ժողովրդավարության և ազատության ոլորտում որևէ էական քայլ չի կատարել: Իրավապաշտպանը համաձայն է այս գնահատականին: Ըստ նրա` առաջընթաց կարելի է գրանցել այն դեպքում, եթե կան ժողովրդավարության և մարդու իրավունքների ոլորտում համակարգային փոփոխություններ: Համակարգային փոփոխություններ ասելով`իրավապաշտպանը նկատի ունի օրենսդրական բարեփոխումներ դատական իշխանության անկախության համար, ՀՌԱՀ ինստիտուցիոնալ բարեփոխումներ, իրավապահ մարմիններում հստակ ինստիտուցիոնալ բարեփոխումներ և ոչ` անձերի փոփոխություն, նույնը` ընտրական համակարգում:
Ավետիք Իշխանյանի համոզմամբ` սրանք կլինեին փոփոխություններ, որոնք կարող էին իրենց պտուղները տալ: «Հայաստանում չակերտավոր առաջընթաց է համարվում այն, որ ամեն նախագահական ընտրություններից հետո Հայաստանում խիստ լարված դրությունը պարզապես մեղմանում է: Նախագահական ընտրություններին ունենում ենք ծանր շրջան, և հասարակությունը հետ է ընկնում մի քանի տարով: Այդ ժամանակահատվածում Հայաստանը մոտենում է բռնապետական պետության, հետագայում մեկ-երկու տարի անց, որոշ իմաստով իրավիճակը մեղմանում է, բաց են թողնվում քաղբանտարկյալները, թույլ են տրվում անցկացնել հանրահավաքներ և այլն»,- մեկնաբանեց իրավապաշտպանը`հավելելով, որ սա համարել առաջընթաց, ինչպես համարում են Եվրոպայի խորհրդի փորձագետները, անթույլատրելի է:
