Իշխանություններն ուշադրություն չեն դարձնում միջազգային կազմակերպությունների, այդ թվում՝ իրավապաշտպան «Ֆրիդոմ հաուզի» գնահատականների վրա, և չեն դարձնի, քանի դեռ ներողամիտ վերաբերմունքի են արժանանում նույն այդ կազմակերպությունների կողմից: «Առաջին լրատվական»-ի հետ զրույցում այս մասին հայտարարեց իրավապաշտպան Միքայել Դանիելյանը:
«Միջազգային իրավապաշտպան կառույցների գնահատականների վրա ուշադրություն չդարձնելու վիճակին նպաստել են Հայաստանի մասին զեկույցներ կազմող երկրները: Այդ երկրները հետամուտ չեն լինում սեփական զեկույցներում տեղ գտած որակումներին, և քանի դեռ նրանք այսպիսի դիրքորոշում են ցուցաբերում, ՀՀ իշխանությունները շատ հանգիստ են լինելու և չեն անհանգստանալու: Հենց այդ երկրներն են մեղավոր, որ մենք այսօր այս վիճակում ենք: Իշխանությունները հանգիստ են, նրանք գիտեն, որ իրենց վրա ճնշումներ չեն գործադրվելու, հանգիստ են, որ ամեն բան իրենց ներվելու է»,- ասաց իրավապաշտպանը:
Միկա Դանիելյանն ամփոփելով անդրադարձավ նաև «Ֆրիդոմ Հաուզի» զեկույցի՝ ԼՂՀ ժողովրդավարության և ազատությունների մակարդակի վերաբերյալ գնահատականներին՝ նկատելով, որ չճանաչված պետությունն առհասարակ չպետք է ներառվեր նման զեկույցի մեջ: «Երբ ԼՂՀ վերջնական կարգավիճակը կորոշվի, երբ այնտեղ էլ սկսեն մոնիտորինգներ անցկացնել, այդ ժամանակ էլ թող զեկույցներ կազմեն: Իսկ առայժմ ԼՂՀ-ն փաստացի որևէ կարգավիճակ չունի, և որոշել՝ ոտնահարվո՞ւմ են արդյոք այնտեղ մարդու իրավունքները, թե՞ ոչ, ճիշտ չէ»,- ասաց Միքայել Դանիելյանը:
Նշենք, որ ըստ «Ֆրիդոմ Հաուզ» միջազգային իրավապաշտպան կազմակերպության երեկ հրապարակած տարեկան զեկույցի՝ Հայաստանը 2011 թվականի ընթացքում ժողովրդավարության ու ազատության ոլորտում նշանակալից որևէ քայլ չի կատարել: Տասը տարի շարունակ Հայաստանն այդ զեկույցում դասվում է մասամբ ազատ երկրների շարքին:
Մասամբ ազատ երկրները, ըստ «Ֆրիդոմ հաուզ»-ի բնորոշման, այն պետություններն են, որտեղ բավարար հարգանք չի դրսևորվում քաղաքական իրավունքների ու քաղաքացիական ազատությունների նկատմամբ, օրենքի իշխանությունը թույլ է, ու չնայած բազմակարծության որոշակի մակարդակ կա, այդուամենայնիվ, քաղաքական դաշտում գերիշխում է ընդամենը մեկ կուսակցություն։ Նշվում է նաև, որ այս խմբում ընդգրկված երկրները, որպես կանոն, տուժում են կոռուպցիայից:
Այս տարվա զեկույցում որևէ առաջընթաց չի արձանագրել նաև Լեռնային Ղարաբաղը, որն ընդգրկված է վիճահարույց տարածքների ցանկում։ Զեկույցում Ղարաբաղը բնութագրվել է որպես անազատ. երկիր, որտեղ հիմնական քաղաքական իրավունքները բացակայում են, քաղաքացիական ազատությունները` լայնորեն և շարունակաբար ոտնահարվում։
Իսկ ահա առանց այդ էլ անազատ համարվող Ադրբեջանը, ըստ միջազգային կազմակերպության, 2011-ին ավելի է զիջել դիրքերը «ընդդիմադիր ակտիվիստներին ձերբակալելու, ցույցերը ցրելու, միջազգային մամուլը չեզոքացնելու և հանուն լայնածավալ քաղաքաշինական ծրագրերի քաղաքացիներին սեփական տներից զրկելու պատճառով»։