Թուրքական Beyaz Gazete-ի փոխանցմամբ՝ թուրք լրագրող Ահմեթ Հաքանին զայրացրել են Twitter սոցցանցում կատարված հակահայկական ազգայնամոլ գրառումները։ Այդ կապակցությամբ նա խոստացել է ուղիղ եթերում հայտարարել, որ ինքը հայ է և կատարել է իր խոստումը։
Հաքանը եթերում հայտարարել է, որ Թուրքիայում «Դու հա՞յ ես» հարցը վերածվել է հայհոյանքի. «Նման կերպ մտածողների համար ես այստեղից ասում եմ, այո՛, ես հայ եմ։ Ինձ ասում են, թե դու արդյոք կարո՞ղ ես Երևանում ասել, որ դու թուրք ես։ Եթե ես դա չկարողանամ ասել, ապա դա կլինի Երևանի ամոթը։ Եթե ես կարողանամ Ստամբուլում հայտարարել, որ ես հայ եմ, ապա դա կլինի Ստամբուլի պատիվը»։
Հիշեցնենք, որ նախորդ տարվա մարտի սկզբին թուրքական Hürriyet թերթն անդրադարձել էր հայ կամ հրեա լինելու մեջ թուրք քաղաքական գործիչներին ու պաշտոնյաներին ուղղված մեղադրանքների խնդրին.
ա) Ցայժմ Թուրքիայում չի գտնվել որևէ պաշտոնյա կամ առաջնորդ, ով քաջություն կունենար և ի պատասխան «Դու հա՞յ ես» հարցին, կասեր «Այո՛, ես հայ եմ, ասածդ ի՞նչ է:
բ) Հայ կամ հրեա լինելու մեջ մեղադրվողները կարծում են, թե դա իրենց հասցեագրված վիրավորանք է և իսկույն վկայակոչում են իրենց տոհմածառն ու արմատները:
գ) Հանրության մի ստվար հատված խրախուսում է բոլոր նրանց, ովքեր հայկական կամ հրեական ծագում ունենալու հանգամանքը համարում են մեղսագործություն: