«Աստղային պատերազմներ» և «Ինդիանա Ջոնս» ֆիլմերի հեղինակ Ջորջ Լուկասը պատրաստվում է հրաժեշտ տալ կինոբիզնեսին:
«Ես հեռանում եմ: Ետևում եմ թողնում այս բիզնեսը, այս վազքը, ընդհանրապես՝ այս ամենը»,- ռեժիսորի խոսքերն է մեջբերում The New York Times-ը:
Լուկասի հիասթափությունն է հարուցել նրա վերջին պրոդյուսերական նախագծին հոլիվուդյան ստուդիաների արձագանքը: Ֆիլմը ավիացիոն էպոս է Երկրորդ համաշխարհային պատերազմի ժամանակներից և կոչվում է «Կարմիր պոչեր»: Այն նվիրված է ԱՄՆ ռազմաօդային ուժերի առաջին սևամորթ օդաչուների ջոկատին, որոնք իրենց անվանում էին «Թասքիջիի ջոկատ» և ինքնաթիռների կորպուսը ներկում էին կարմիր գույնով:
Սակայն Լուկասի այս նախագիծը ոչ մի հետաքրքրություն չի առաջացրել խոշոր ստուդիաներում, նրանց ներկայացուցիչներն անգամ դիտումներին ներկա չեն եղել:
Արդյունքում Լուկասը ստիպված է եղել ինքը վճարել ամեն ինչի համար: XX Century Fox-ը, ի վերջո, համաձայնել է իր վրա վերցնել ֆիլմի տարածումը Հյուսիսային Ամերիկայի սահմաններում, սակայն նախագծում ոչ մի ցենտի ներդրում չի կատարել:
«Կարմիր պոչերը» վերջին ֆիլմն էր, որ նա ուզում էր նկարահանել: Առաջին անգամ նա փորձել է դա անել 23 տարի առաջ, իսկ այժմ ամեն ինչ ավարտել է: Նրան հաջողվել է այն, ինչ հազիվ թե ստացվեր մի շարք ռեժիսորների մոտ. նա արել է այն, ինչ ցանկանում էր: Այժմ նրա կյանքում նոր փուլ է սկսվում»,- ասել է Լուկասի բոլոր վերջին նախագծերի պրոդյուսեր Ռիք Մաքքալումը:
Նրա խոսքերով՝ այժմ Լուկասը կսկսի նկարահանել փորձնական, արտհաուսային ֆիլմեր, այնպիսիք, ինչպիսիք նա նկարահանում էր 1950-ականներին՝ նախքան «Աստղային պատերազմները»: