Mavi Marmara թուրքական նավը, որը «Խաղաղության նավատորմի» կազմում անցած մայիսի 31-ին մեկնել էր Պաղեստին (իսրայելական սահմանապահ ուժերի հետ բախման արդյունքում նրա վրա զոհվել էր 9 թուրք, 8-ը՝ Թուրքիայի, 1-ը` ԱՄՆ-ի քաղաքացի), հաջորդ տարվա մայիսի 31-ին կրկին ուղևորվելու է Գազայի հատված:
Այս մասին հաղորդել է Europe1 ռադիոընկերությունը` հղում անելով Հումանիտար օգնության թուրքական հիմնադրամին:
Հայտնի է դարձել, որ Mavi Marmara նավն այսօր ժամանել է Ստամբուլի նավահանգիստ այն բանից հետո, երբ «Խաղաղության նավատորմի» կազմակերպիչներն այն գնել էին իսրայելական իշխանություններից: Նավահանգստում նավը դիմավորել են հազարավոր ստամբուլցիներ: Նավի վրա կախված են եղել սպանվածների նկարները, իսկ Ստամբուլի հրապարակներից մեկում կազմակերպվել է հանրահավաք՝ ի պաշտպանություն Պաղեստինի:
Հիշեցնենք, որ մայիսի 31-ին այդ բախումը տեղի էր ունեցել այն բանից հետո, երբ «Խաղաղության նավատորմը», որը կազմված էր 6 նավերից, փորձել է, չնայած իսրայելական սահմանապահների զգուշացումներին, հասնել պաղեստինյան Գազայի հատված: Երբ իսրայելական հատուկ ջոկատայիններն իջել են Mavi Marmara նավի վրա, սկսվել է բախում, որի արդյունքում սպանվել է 9 թուրք, իսրայելական մի քանի զինվորականներ ստացել էին վնասվածքներ: