Թուրքական Sabah թերթի փոխանցմամբ՝ քուրդ գրող և քաղաքական գործիչ Քեմալ Բուրքայը հայտարարել է, որ Քրդստանի աշխատավորական կուսակցության (PKK) 1500-2000 զինյալներ վերջին շրջանում անցել են Սիրիա։
Բուրքայն ընդգծել է, որ PKK-ականներն օգնելու են Սիրիայի նախագահ Բաշար Ալ-Ասադին, որը Թուրքիայի հետ հարաբերությունների վատացումից հետո ցանկանում է Թուրքիայի դեմ գործի գցել քրդական խաղաքարտը։
Հիշեցնենք, որ նախորդ տարվա դեկտեմբերի 29-ին թուրքական Vatan թերթը գրեց, որ PKK-ն պատմական որոշում կայացնելու նախաշեմին է. «PKK-ի հիմնադիր Աբդուլլահ Օջալանի ձերբակալության պայմաններում PKK-ի փաստացի առաջնորդ Մուրադ Քարայըլանը դիտարկում է Հյուսիսային Իրաքում առկա PKK-ի ճամբարներն այլ երկրներ տեղափոխելու հարցը։
Դա մասնավորապես վերաբերում է հարևան երկրներին՝ Սիրիային ու Իրանին։ Պատճառը վերջին շրջանում Թուրքիայի և Հյուսիսային Իրաքի Քրդական Ինքնավարության ղեկավարության միջև հաստատված կառուցողական հարաբերություններն են, ինչն անհանգստացրել է PKK-ի ղեկավարությանը։ Բացի այդ, Թուրքիայի ռազմաօդային ուժերը շարունակ ռմբակոծում են Հյուսիսային Իրաքը»։
Իսկ դրանից ավելի քան մեկ ամիս առաջ թուրքական Akşam թերթը գրել է, որ Աբդուլլահ Օջալանն իր ռազմական աջակցությունն է առաջարկել Ասադին ընդդիմության դեմ պայքարում. «Աբդուլլահ Օջալանը այս տարվա մայիսի 18-ին բանտից իր փաստաբանի միջոցով նամակ է ուղարկել Սիրիայի նախագահ Բաշար Ալ-Ասադին։
Այդ նամակում Օջալանն իր աջակցությունն է հայտնել Ասադին ընդդիմության դեմ պայքարում՝ առաջարկելով այդ նպատակով Հյուսիսային Իրաքից Սիրիա գործուղել 1000 PKK-ականների։ Օջալանն իր այդ մոտեցումը պայմանավորել է նրանով, որ Բաշար Ալ-Ասադը չի ցանկանում թշնամանալ քրդերի հետ»։
