ՀՀ նախագահ, Հայաստանի շախմատի ֆեդերացիայի նախագահ Սերժ Սարգսյանը ներկա է գտնվել Հենրիկ Գասպարյանի անվան շախմատի և շաշկու օլիմպիական մանկապատանեկան մարզադպրոցի 50-ամյակին նվիրված մրցաշարի փակման արարողությանը, որի ժամանակ մրցաշարի հաղթողները պարգևատրվել են գավաթներով, պատվոգրերով և հուշամեդալներով:
Այնուհետև տեղի է ունեցել Ֆեդերացիայի խորհրդի նիստը, որը վարել է Խորհրդի նախագահ Սերժ Սարգսյանը: Օրակարգի շրջանակներում քննարկվել և հաստատվել է 2011թ. պաշտոնական մրցումների կանոնադրությունը: Այն ներառում է Հայաստանի 71-րդ և 72-րդ, կանանց 66-րդ, 67-րդ առաջնությունները, պատանիների և աղջիկների առաջնությունները, ինչպես նաև Հայաստանի ակումբային և կանանց ակումբային առաջնություններն ու Հայաստանի արագ շախմատի առաջնությունը:
Նիստում Խորհուրդը որոշում է ընդունել նաև Հայաստանի շախմատի ֆեդերացիայի կոնֆերանսի հրավիրման մասին: Իրենց հաղորդումներն են ներկայացրել Վետերանների, Կոմպոզիցիայի, Մրցավարական հանձնաժողովները:
Շախմատի ֆեդերացիայի խորհուրդը հաստատել է Ռաֆայել Վահանյանի 60-ամյակին նվիրված միջոցառումները, լսել աշխարհի, Եվրոպայի առաջնություններում և համաշխարհային օլիմպիադայում աչքի ընկած պատանի շախմատիստների պարգևատրման հարցը:
