Ֆլորիդայի այգիներից մեկում այրվել է աշխարհի ամենածեր նոճին: Նահանգի անտառաբուծության տվյալների փոխանցմամբ՝ Սենատոր անունով 36 մետրանոց նոճին վառվել է երկուշաբթի առավոտյան:
Ինչպես հայտնում է Orlando Sentinel-ը, չնայած գործադրած մեծ ջանքերին` դեպքի վայր ժամանակ փրկարարներին չի հաջողվել փրկել ծառը: Սկզբում ընկել է նոճու այրված գագաթը, այնուհետև հսկայական ծառն ամբողջությամբ:
Հետաքննություն է սկսվել եզակի ծառի վառվելու հանգամանքները պարզելու համար, սակայն անտառաբուծության ներկայացուցիչները բացառում են կանխամտածված այրումը: Պարբերականը նշում է, որ այգու շրջանում հրդեհի բռնկման պահին կայծակ չի գրանցվել:
Մասնագետներին արդեն հաջողվել է ուսումնասիրել նոճու տարեկան օղակը, և նրանք եկել են այն եզրակացության, որ ծառը 3,5 հազար տարեկան էր:
Սենատորի երկարությունը նախկինում եղել է 50 մետր, սակայն 1925 թվականին փոթորկի հետևանքով ծառը կորցրել էր գագաթը:
Իր անունը հսկայական ծառը ստացել է տեղի քաղաքական գործիչներից մեկի պատվին, որը նահանգին նվիրել էր տարածքը, որտեղ այժմ գտնվում է այգին: