Երեկ խաչմերուկներում տեղադրված տեսախցիկներն ու արագաչափ սարքերը ֆիքսել են 300 ավտոճանապարհային խախտում: Այսօր լրագրողների հետ հանդիպման ժամանակ տեղեկացրեց «Աքիլլես» ավտովարորդների իրավունքների պաշտպանության կենտրոն հ/կ նախագահ Էդուարդ Հովհաննիսյանը` խոսելով մայրաքաղաքի տասը խաչմերուկներում երեկ տեղադրված տեսախցիկների և արագաչափ սարքերի արդյունավետության մասին: Ըստ նրա` դա մեծ ցուցանիշ չէ, քանի որ ամեն օր Երևանում գրանցվում է 2130 ճանապարհային խախտում: Բանախոսի համոզմամբ` սա արդյունավետ ծրագիր է և հինգ տոկոսով կնվազեցնի կոռուպցիոն ռիսկերը:
Հիշեցնենք, որ երեկ մայրաքաղաքի կենտրոնական տասը խաչմերուկներում գործարկվեցին ճանապարհային խախտումներն արձանագրող տեսախցիկներ ու արագաչափ սարքեր: Բանախոսը ներկայացրեց խախտման արձանագրման ծրագիրը. օպերատորը գրանցում է խախտումը, բայց համարանիշը չի տեսնում, երկրորդ փուլում խախտումն ավելի հստակ է արձանագրվում, և երևում է ավտոմեքենայի պետհամարանիշը: «Այս փուլում մասնագետը որակավորում է տալիս խախտմանը և ուղարկում ՃՈ»,- նշեց Է. Հովհաննիսյանը` հավելելով, որ կասկածանքով է վերաբերվել ծրագրի արդյունավետությանը, իսկ այսօր արդեն հավատում է, որ կապահովվի դա, քանի որ երեկ հետևել է ծրագրին:
Նա ցավով նշեց, որ երեկ մայրաքաղաքի կենտրոնական` Արշակունյաց պողոտայում 180կմ/ժամ արագությամբ ընթացող երկու մեքենայի խախտում է գրանցվել, որի համար նախատեսվում է 30 000 դրամ տուգանք:
«Տեսախցիկներով խախտումներ արձանագրելը մեզ կհուշի, թե ինչպիսի փոփոխություններ կարելի է կատարել երթևեկության կանոնների օրենքում` երթևեկությունը ավելի վերահսկելի դարձնելու համար: Ճանապարհային խախտումների շուրջ շատ վիճելի հարցեր են առաջանում, և անհրաժեշտ են համակարգային օրենսդրական փոփոխություններ»,- մեկնաբանեց Է. Հովհաննիսյանը: Լրագրողի այն դիտարկմանը, թե ինչպես է հնարավոր այս համակարգում նվազեցնել մարդկային գործոնը` կոռուպցիոն ռիսկերը, հ/կ նախագահը պատասխանեց` եթե բոլոր հարցերն այս տեսանկյունից դիտարկվեն, կոռուպցիոն ռիսկերը կնվազեն:
