Wikipedia օնլայն հանրագիտարանի անգլիալեզու բաժինը հունվարի 18-ին մեկ օրով չի աշխատի: Դրանով կայքի ղեկավարությունը ցանկանում է իր բողոքն արտահայտել ԱՄՆ Կոնգրեսի քննարկմանը դրված օրինագծի դեմ, ըստ որի՝ իշխանություններին հնարավորություն կտրվի փակել այս կամ այն ինտերնետ-կայքը, եթե վերջինս չարտոնագրված կոնտենտ է պարունակում: Այս մասին հաղորդում է Associated Press-ը:
«Սովորողներ, ձեր տնային առաջադրանքները նախօրոք արեք: Չորեքշաբթի ռեսուրսը փակ կլինի»,- Wikipedia-ի այցելուներին է դիմել կայքի հիմնադիր Ջիմմի Ուելսը:
Վիճելի օրինագծի ընդունման օգտին հանդես են գալիս խոշորագույն հոլիվուդյան կինոստուդիաները, որոնք ամենաշատն են ենթարկվում «ծովահենությանը»: Դրա դեմ հանդես են գալիս Սիլիկոնային հովտի կորպորացիաները: Այս երկու խմբերի միջև հակամարտությունն առավել հստակ արտահայտվեց, երբ News Corp. ընկերության ղեկավա Ռուպերտ Մերդոկը օրերս Google ընկերությունն անվանեց «ծովահենության» առաջնորդ:
Սպիտակ տունը դեմ է արտահայտվել այդ տեսքով օրինագծի ընդունմանը:
