Ինչպես հաղորդում է բրիտանական BBC-ն, երկու շվեդուհիները, որոնք WikiLeaks-ի հիմնադիր Ջուլիան Ասանջին մեղադրում են սեռական հողի վրա կատարված հանցագործությունների համար, աջակցում են WikiLeaks կայքին: Ըստ տուժածների փաստաբանի՝ նրանք միայն ցանկանում են, որպեսզի արդարությունը հաղթի այն գործում, որը վերաբերում է իրենց անձնական կյանքին: Փաստաբանը նշել է նաև, որ սին են այն բոլոր խոսակցությունները, իբր շվեդուհիներն այդ ամենն անում են ԱՄՆ հետախուզությունների դաշնային վարչության հրահրմամբ:
Հիշեցնենք, WikiLeaks սկանդալային կայքի հիմնադիր Ջուլիան Ասանջը, որը մեկ ամիս առաջ սկսեց հրապարակել ԱՄՆ պետքարտուղարության գաղտնի փաստաթղթերը, Շվեդիայի իրավապահների կողմից մեղադրվում է երկու շվեդուհիների բռնաբարելու համար: Այս պահին Ասանջը գտնվում է Մեծ Բրիտանիայում. դեկտեմբերի 16-ին գրավի դիմաց ազատվելուց հետո նա սպասում է, թե հունվարի կեսերին ինչ վճիռ կկայացնի բրիտանական դատարանն իր արտահանձնման վերաբերյալ:
