ՀՀԿ մամլո ծառայությունից տեղեկացնում են, որ հունվարի 14-ին ՀՀԿ գրասենյակում տեղի է ունեցել միջոցառում, որի ընթացքում ՀՀԿ երիտասարդական կազմակերպությունն ամփոփել է նախապես հայտարարված «Իսլամական աշխարհում հեղափոխական իրադարձությունների նախադրյալները և պատճառահետևանքային կապի վերլուծությունը» թեմայով վերլուծական աշխատանքների մրցույթի արդյունքները:
Մրցույթին ներկայացված աշխատանքների ընտրությունը կատարվել էր մրցութային մասնագիտական հանձնաժողովի կողմից: Լավագույնը ճանաչված աշխատանքի հեղինակ Դավիթ Սարգսյանը պարգևատրվել է 100.000 դրամով, իսկ 3-րդ տեղերը գրաված Սոնա Սարգսյանը և Նաիրա Պողոսյանը` 50.000-ական դրամով: Մասնակիցները պարգևատրվել են նաև գրքերով, պատվոգրերով և շնորհակալագրերով:
Հաղթողներին և մասնակիցներին շնորհավորել են ՀՀԿ երիտասարդական կազմակերպության ղեկավար, ՀՀ Ազգային ժողովի պատգամավոր Կ. Ավագյանը, ինչպես նաև՝ մասնագիտական հանձնաժողովի նախագահ, թուրքագետ Ռ. Մելքոնյանը: Օգտվելով առիթից, Կ. Ավագյանը նաև շնորհավորել է ներկաներին Ցեղակրոնի օրվա առթիվ` նշելով, որ ցեղակրոնությունը գենը կրելու կարողությունն է, և յուրաքանչյուր հայորդի ցեղակրոն է: