Գալիք ընտրություններում առաջամարտիկ կլինեն թերթերը: «Առաջին լրատվական»-ի հետ զրույցում նման տեսակետ հայտնեց «Ազգ» օրաթերթի գլխավոր խմբագիր Հակոբ Ավետիքյանը`խոսելով այն լրատվամիջոցներից, որոնք իրենց աշխատանքով կկարևորվեն գալիք խորհրդարանական ընտրություններում:
Նա բարձր գնահատեց տպագիր մամուլի քաղաքական ակտիվությունը և զերծ մնաց թերթերի անուններ նշելուց: Ըստ նրա` Հայաստանում կան երեք-չորս թերթեր, որոնք լուրջ կմոտենան ընտրությունների լուսաբանմանը, քան ուրիշները: Նա կարծում է, որ ակտիվ կլինեն թերթերը, որովհետև դրանք են վերլուծական հոդվածներ տպագրում: «Թերթերում են աշխատում ավելի բանիմաց, խորը և մակարդակով լրագրողներ: Հետևաբար թերթերն ավելի լավ են աշխատում, քան ինտերնետային կայքերը: Տպագիր մամուլը շատ ավելի լուրջ կմոտենա ընտրություններին և երևույթը կներկայացնի բազմակողմանիորեն»,- մեկնաբանեց Հ. Ավետիքյանը`հավելելով, որ կուսակցությունների քարոզչությունը կմնա հեռուստատեսության մենաշնորհը:
«Ազգ» օրաթերթի գլխավոր խմբագրի համոզմամբ` ի տարբերություն նախորդ ընտրությունների, այս ընտրություններում դեր կունենան ինտերնետային ծառայությունները: Ըստ նրա` ինֆորմացիան ավելի բաց կլինի: «Այս տարի մի մեծ տարբերություն կլինի. մեր ինտերնետային ծառայությունների` Facebook-ի, Youtube-ի պայմաններում ընտրությունների այս կամ այն դրվագի և երևույթի կոծկումը կդառնա շատ ավելի դժվար, չնայած կստեղծվի ինֆորմացիոն խառնափնթոր վիճակ, բայց կարևոր է, որ այս անգամ հասարակությունը իմանա շատ ավելի թաքցված և կոծկված տեղեկություններ, քան նախորդ բոլոր ընտրություններում»,- ամփոփեց Հ. Ավետիքյանը:
