Հայաստանն այսօր նման է մի այլանդակ պտղի, որը 20 տարի առաջ է ծնվել, բայց պորտալարը մինչև հիմա չեն կտրել ու Հայաստանը ծնող այլանդակ մայրը` Ռուսաստանը, հենց ուզում է մի շարժում անել` մենք այս ու այն պատին ենք խփվում, քանի որ պորտալարը կարճ է: «Առաջին լրատվական»-ի հետ զրույցում, անդրադառնալով երկրի հասարակական-քաղաքական վիճակին, զայրացած ասաց երգիչ-երգահան Էդուարդ Զորիկյանը:
Նրա խոսքով, «պորտալարը» մեծ զոհողությունների գնով կարողացավ կտրել Վրաստանը: «Մարդիկ ասացին` մենք ուզում ենք ազատ ապրել: Մենք ուզում ենք վրացական պար պարել, ոչ թե ռուսական կամ թուրքական: Մենք չենք ուզում մեր ժողովրդին կոտորել, ոնց որ հայերն են կոտորում»,- ասաց նա՝ հավելելով, որ պետությունը պետք է կանգնի իր ժողովրդի մեջքին, օրինակ` ոստիկանը եթե տեսնում է ծեր կին է անցնում փողոցով, պետք է օգնի անցնել փողոցը, ոչ թե արևածաղիկ «չրթի» նախագահականի դիմաց պպզած:
«Արդեն որերորդ անգամ եմ այդ դեպքին ականատես լինում: Այ էս ենք: Եթե զինվորը քայլել չգիտի, եթե ոստիկանի դեմքին նայում ես ու հասկանում` նա քո առաջին թշնամին է, ի՞նչ ասես: Նայում եմ, թե ովքեր են նստած Ազգային ժողովում` ազգի ջոջերը, այս ազգի ընտրյալները, ու իրենք են որոշում` ինչ օրենքներով ապրենք: Այն, ինչ պիտի վերաբաշխեին ժողովրդի միջև, ուտում են»,- ասաց երգահանը: