Հայերի 1990 թվականի հունվարյան, ինչպես նաև Բաքվի ու Սումգայիթի ջարդերի հանցանքը ստվերելու համար Բաքուն անում է հնարավոր ամեն ինչ: Այսօր` ջարդերի 22-ամյա տարելիցի օրը, լրագրողների հետ հանդիպմանը հայտարարեց Ադրբեջանահայերի ասամբլեայի նախագահ Գրիգորի Այվազյանը:
«Ազգային հողի վրա Բաքվում 1990 թվականի հունվարին մեկ շաբաթ շարունակ հայերի զանգվածային ջարդեր էին կազմակերպվում, և ոչ ոք չէր փորձում կանխել կատարվող հանցագործությունը: Ոչ ոք չէր միջամտում ոճրագործությանը, և թեպետ խորհրդային Ռուսաստանը այդ ջարդերի նախաձեռնողը չէր, սակայն դա կատարվում էր նրա, ինչպես նաև ժողճակատի վարչության գիտության ներքո:
Հունվարյան ջարդերի ողջ պատասխանատվությունը կրում են կոնկրետ մարդիկ`Խալիլ Ռըզա, Մուհամեդ Հաթամի, Նեյմաթ Պանախով, Սեյիդ Թահիր Ղարաբաղի, Էյթիբար Մամեդով, Աբդուրահման Վեզիրով և այլն: Այս բոլոր մարդիկ այնուհետև բարձրագույն պաշտոններ ստացան, և հիմա մեզ համար անհասանելի է նրանց պատժելը: Պատժելու մի տարբերակ կա` Նյուրենբերգյան դատավարություն կազմակերպելը: Երկրորդ տարբերակը Հաագայի միջազգային դատարան դիմելն է: Հաագա հասնելու համար, սակայն, պետք է համախմբել ողջ հայությանը:
Մեր կարծիքով` հանցագործներին պատժելու երրորդ տարբերակը ուղղակի ոճրագործներին մահապատժի ենթարկելն է: Մենք չենք ընկրկելու և մեր պայքարը մինչև վերջ ենք տանելու: Սակայն միայնակ անկարող ենք գործել, հետևաբար աշխատում ենք համագործակցել շահագրգիռ անձանց ու կազմակերպությունների, այդ թվում` Ադրբեջանում բնակվող ազգային փոքրամասնությունների հետ: Մեր գործառույթը ճշմարտության վերհանումն է»,- ասաց նա:
Գրիգորի Այվազյանի խոսքով` Ադրբեջանում հայերի թողած անշարժ գույքի արժեքը մոտ է 100 մլրդ դոլարի: «Ես ինքս Բաքվում երեք բնակարան ունեմ` սեփականության բոլոր փաստաթղթերով, այն էլ` քաղաքի ամենալավ հատվածում»,- փաստեց Ադրբեջանահայերի ասամբլեայի նախագահը:
Ամփոփելով` նա անդրադարձավ նաև Մարդու իրավունքների եվրոպական դատարանի` հունվարի իննին քննության առած «Սարգսյանն ընդդեմ Ադրբեջանի» հայցին` նկատելով, որ այդ հարցում ՄԻԵԴ-ը չպետք է պարիտետայյին որոշում կայացնի: «Հայցը, կարծում եմ, կբավարարվի, դրա համար կան բոլոր հիմքերը»,- նշեց Այվազյանը:
