Հունվարի 9-ին հրդեհի հետևանքով փլուզվել էր Թբիլիսիի Սուրբ Նշան հայկական եկեղեցու հյուսիսարևելյան հատվածը: Արդեն մի քանի օր է՝ հակասական տեղեկություններ են ստացվում հրդեհի պատճառների շուրջ: Վրաց պաշտոնյաներից մեկի համոզմամբ, հրդեհի մասին լուրերը իրականությանը չեն համապատասխանում:
«Առաջին լրատվական»-ը փորձեց պարզել, թե ինչ է իրականում տեղի ունեցել: Այս հարցով զրուցեցինք Թբիլիսիի հայերի ասամբլեայի ղեկավար Առնոլդ Ստեփանյանի հետ: Նա հաստատեց, որ եկեղեցում հրդեհ է բռնկվել, սակայն ասաց, որ տեղային բնույթ է կրել՝ վնասելով եկեղեցու պատերից մեկը`հյուսիսարևելյան հատվածը: Ըստ նրա` Թբիլիսիի Սուրբ նշան եկեղեցում հյուրեր էին եղել մինչ հրդեհի բռնկումը:
«Արդեն ճշգրտված տեղեկություն է, որ այնտեղ երկու մարդ է մտել, դեռ չգիտենք`ովքեր: Գիտեմ և ենթադրում եմ, որ իրենցից հետո ծխախոտ են թողել, բայց միտումնավոր հրդեհ կազմակերպելու մտադրություն չեն ունեցել: Տեղային հրդեհ է բռնկվել, որին արագ արձագանքել են Հրշեջ ծառայության աշխատակիցները: Եթե եկեղեցին հրդեհելու մտադրություն ունենային, այն արդեն ամբողջությամբ այրված կլիներ, այնինչ տեղային հրդեհ է եղել: Սակայն դա նույնպես համոզված չեմ կարող ասել»,- մանրամասնեց Ա. Ստեփանյանը`հավելելով, որ զբաղվում են այդ մարդկանց ինքնությունը ճշտելու և հանգամանքների մանրամասները պարզելու ուղղությամբ:
Հարցին՝ ինչպե՞ս են ներխուժել եկեղեցի, պատասխանեց, որ դա դժվար չէ: «Կան պատուհաններ, երկու մուտք, այսինքն` փակ է, բայց բացելու դժվարություն չկա: Այնտեղ ցանկացած պահի կարող է մտնել ցանկացած մարդ, ով ցանկանում է: Մենք մի քանի անգամ դիմել ենք մշակույթի նախարարին, որպեսզի այնպիսի դռներ տեղադրեն, որ օտար մարդիկ չկարողանան ներխուժել: Ցավոք, ոչ մի պատասխան չենք ստացել: Այն, ինչ այդ եկեղեցում կատարվում է՝ Մշակույթի նախարարության անուշադրության արդյունքն է»,- նշեց Ա. Ստեփանյանը`հավելելով, որ արդեն երկու հրդեհ եղել է Սուրբ Նշան եկեղեցում:
Նշենք, որ Սուրբ Նշան եկեղեցին պատկանում է Թբիլիսիի քաղաքապետարանին, և Առնոլդ Ստեփանյանի համոզմամբ, Մշակույթի նախարարությունը պետք է զբաղվի եկեղեցու վերականգնողական աշխատանքներով:
